GJOSUÈ (4)

Letôr: Luca Bagnarol

Lis dodis pieris a memorie dal passaç

41Cuant che dut il popul al finì di passâ di là dal Gjordan, il Signôr i fevelà a Gjosuè cussì: 2“Sielgêtsi dodis oms dal popul, un par tribù, 3e daitjur chest ordin: Puartait vie di chi, tal mieç dal Gjordan, là che a son poiâts i pîts dai predis, dodis pieris che ses puartarês daûrsi e lis metarês tal lûc là che o passarês la gnot”. 4Gjosuè al clamà i dodis oms che ju veve sielzûts framieç dai israelits, un par tribù, 5e ur disè: “Passait denant de arcje dal Signôr vuestri Diu fin tal mieç dal Gjordan e ognun di vualtris che al cjoli su pes spalis une piere seont il numar des tribûs di Israel, 6par ch’e resti une memorie framieç di vualtris; e cuant che i vuestris fîs us domandaran: Ce vuelino dî par vualtris chestis pieris achì?, 7ur rispuindarês: Al è par vie che lis aghis dal Gjordan si son dividudis denant de arcje dal pat dal Signôr: cuant che a passarin il Gjordan, lis aghis dal Gjordan si son dividudis. Chestis pieris a son une memorie pai fîs di Israel par simpri!”. 8I israelits a faserin come che i veve ordenât il Signôr a Gjosuè, e lis puartarin fintremai là che si jerin fermâts e lis poiarin par tiere.

9Daspò Gjosuè al metè tal mieç dal Gjordan altris dodis pieris, propit tal lûc che si jerin poiâts i pîts dai predis che a puartavin l’arcje dal pat, e a son ancjemò li.

10I predis che a puartavin l’arcje dal pat a restarin in pîts tal mieç dal Gjordan fintremai che nol jere stât fat dut ce che il Signôr i veve ordenât a Gjosuè di dîi al popul e daûr di ce che Mosè i veve ordenât a Gjosuè, e il popul al spesseà a passâ di là. 11Finît che al veve di passâ il popul, e passà l’arcje dal Signôr cui predis, in teste de int. 12I fîs di Ruben, i fîs di Gad e miege tribù di Manasse a passarin denant dai israelits par combati, come che ur veve dit Mosè. 13Un corantemil vuerîrs, ben armâts e pronts par combati, a passarin denant dal Signôr viers la plane di Gjeric.

14Ta chê dì il Signôr al fasè grant Gjosuè denant di dut Israel, che al veve teme di lui come che al veve vût rivuart di Mosè cuant che al jere in vite.

15Dissal il Signôr a Gjosuè: 16“Dà ordin ai predis che a puartin l’arcje de leç di vignî sù dal Gjordan”. 17E Gjosuè ur ordenà ai predis: “Vignît sù dal Gjordan!”. 18Cuant che i predis che a puartavin l’arcje dal pat dal Signôr a vignirin sù dal mieç dal Gjordan e che i lôr pîts si poiarin sul sut, lis aghis dal Gjordan a tornarin tal lôr jet e a tornarin a scori di une rive in chê altre a plen.

A rivin a Galgale

19Ai dîs dal prin mês il popul al montà sù dal Gjordan e si campà a Galgale, a jevade di Gjeric. 20Rivuart a lis dodis pieris che lis vevin cjoltis tal Gjordan, Gjosuè lis metè a Galgale. 21Po ur disè ai israelits: “Cuant che un’altre dì i vuestris fîs ur domandaran ai lôr paris: Ce sono chestis pieris?, 22vualtris ur spiegarês ta chê volte ai vuestris fîs: Israel al à passât il Gjordan cence nancje bagnâsi, 23parcè che il Signôr nestri Diu al à suiadis lis aghis denant di vualtris fin che no jerin passâts ducj di là, precîs che il Signôr vuestri Diu al veve fat tal mâr des Cjanussis, che lu veve suiât fintremai che no jerin passâts di là, 24par che ducj i popui dal mont a sepin trop fuarte ch’e je la man di Diu e par che o vedis timôr dal Signôr, vuestri Diu, par in eterno”.