NUMARS (34)

Letôr: Sergio Cescutti

Confins e ripartizion di Canaan

341Il Signôr i fevelà a Mosè e i disè: 2“Feveliur ai fîs di Israel e dîsiur: Cuant che o jentrarês te tiere di Canaan, cheste e sarà la tiere che us tocjarà in ereditât: la tiere di Canaan.

3Il vuestri confin a misdì al scomençarà tal desert di Sin, dongje di Edom; cussì il vuestri confin a misdì al partissarà de stremitât dal mâr Salât, a jevade; 4chest confin al voltarà disot de subide di Akrabim, al passarà par Sin e si slungjarà a misdì di Kades-Barnee; po al larà indenant viers Cazar-Adar e al passarà par Asmon. 5Di Asmon il confin al voltarà fint al riul dal Egjit e al larà a finîle tal mâr. 6Il vuestri confin a soreli a mont al sarà il mâr Grant: chel al sarà il vuestri confin a soreli a mont. 7Chest al sarà il vuestri confin a miegegnot: partint dal mâr Grant, o tirarês une linie fintremai a la mont di Or; 8de mont di Or, le tirarês in direzion di Amat e il confin al finissarà a Zerad; 9il confin al larà indenant fint a Zifron e al finissarà a Cazar-Enan: chest al sarà il vuestri confin a miegegnot. 10O tirarês il vuestri confin a soreli jevât di Cazar-Enan fint a Sefam; 11il confin al larà jù di Sefam viers Rible, a jevade di Ain; po il confin si sbassarà e al tocjarà il flanc dal mâr di Gjenezaret, a jevade; 12po il confin si slungjarà diluncfûr dal Gjordan e al larà a finîle tal mâr Salât. Cheste e sarà la vuestre tiere cui siei confins torator”.

13Mosè ur dè chest ordin ai fîs di Israel e ur disè: “Cheste e je la tiere che si spartissarês a bruscjete e che il Signôr al à ordenât di dâure a nûf tribûs e miege; 14parcè che la tribù dai fîs di Ruben, seont lis gjernaziis dai lôr vons, e la tribù dai fîs di Gad, seont lis gjernaziis dai lôr vons, e miege tribù di Manasse a àn za vût il lôr toc. 15Chestis dôs tribûs e miege a àn vût il lôr toc di là dal Gjordan di Gjeric, a soreli jevât”.

16Il Signôr i fevelà a Mosè e i disè: 17“Chescj a son i nons dai oms che a spartissaran la tiere fra di vualtris: il predi Eleazar e Gjosuè, fi di Nun. 18O cjolarês ancje un sorestant di ogni tribù par fâ la spartizion de tiere. 19Ve i nons di chescj oms. Pe tribù di Gjude, Caleb fi di Jefune. 20Pe tribù dai fîs di Simeon, Samuel fi di Amiud. 21Pe tribù di Beniamin, Eliad fi di Chislon. 22Pe tribù dai fîs di Dan, il sorestant Buki, fi di Jogli. 23Pai fîs di Josef, pe tribù dai fîs di Manasse, il sorestant Aniel fi di Efod; 24pe tribù dai fîs di Efraim, il sorestant Kemuel fi di Siptan. 25Pe tribù dai fîs di Zabulon, il sorestant Elisafan fi di Parnac. 26Pe tribù dai fîs di Issacar, il sorestant Paltiel fi di Azan. 27Pe tribù dai fîs di Aser, il sorestant Achiud, fi di Selomi. 28Pe tribù dai fîs di Neftali, il sorestant Pedael fi di Amiud”. 29Chescj a son chei che il Signôr ur à ordenât di spartî l’ereditât di Canaan jenfri i fîs di Israel.