APOCALìS (10;11)

Letôr: Antonino Placereani

Il cjastic finâl al sta rivant

101podopo o viodei un altri agnul, ben sestât, ch’al vignì jù dal cîl invuluçât tun nûl e il cerneli cerclât dal arc; al veve la muse tant che il soreli e lis gjambis tant che colonis di fûc. 2Te man al veve un librut viert. Al poià il pît dret sul mâr e chel çamp su la tiere 3e al berlà a grande vôs come un leon cuant ch’al rugnìs. E a pene finît di berlâ lui, i siet tons a faserin sintî la lôr vôs. 4Dopo che i siet tons a vevin fate sintî la lôr vôs, jo o jeri prontât par scrivi cuant ch’o sintii une vôs dal cîl che mi disè: “Met sot sigjîl ce ch’a àn dit i siet tons e no sta scrivilu”.

5Alore l’agnul ch’o vevin viodût cuntun pît sul mâr e cuntun pît su la tiere

al alçà la gjestre viers dal cîl

6e al zurà par chel ch’al vîf tai secui dai secui;

ch’al à creât cîl, tiere, mâr e dut ce ch’al è dentri: “Vonde spietât! 7Tai dîs che il setim agnul al fasarà sintî la sô vôs e al sunarà la trombe, alore il misteri di Diu si colmarà come che lui ur à contât ai siei servidôrs, i profetis”.

Il librut dolç e mâr

8Po la vôs ch’o vevi sintude dal cîl e tornà indaûr a fevelâmi: “Va, cjol il libri viert de man dal agnul ch’al sta impilât sul mâr e su la tiere”. 9Alore mi sdongjai dal agnul e lu preai di dâmi il librut. E chel mi disè: “Cjolilu e glotilu; ti jemplarà i budiei di marum ma in bocje ti sarà dolç tant che la mîl”. 10O cjolei chel librut de man dal agnul e lu glotei; in bocje lu sintii dolç tant che la mîl, ma a pene parât jù o sintii tai budiei dut il so marum. 11Alore mi fo dit: “Tu âs di profetâ ancjemò sun tune vore di popui, di gjernaziis e di rês”.

I doi testemonis

111Podopo mi fo dade une cjanusse, uso une stage, e mi fo dit: “Jeve sù e misure il santuari di Diu e l’altâr e il numar di chei ch’a son li ch’a laudin. 2Il curtîl, ch’al è fûr dal santuari, lassilu di bande, no sta misurâlu, parcè che ur al àn dât ai paians ch’a tibiaran la citât sante par corantedoi mês. 3Ma o fasarai in mût che i miei doi testemonis, vistûts di sac, a rivin in puart cu la lôr mission di profetis par mil dusinte e sessante dîs”. 4Chescj a son i doi ulivârs e i doi cjandelîrs ch’a stan denant dal Signôr dal mont. 5Se cualchidun i vignis sù chê di fâur dal mâl, de lôr bocje al saltarà fûr un fûc ch’al brustulissarà i siei nemîs. E ducj chei ch’a masanin alc cuintri di lôr, a àn di fâ cheste fin. 6Lôr a àn il podê di inclostrâ il cîl par che no coli nancje une gote di ploe intant ch’a profetaran. A àn ancje il podê di tramudâ l’aghe in sanc e di pestâ la tiere cun ogni sorte di flagjei ogni volte ch’a volaran. 7E cuant ch’a varan finide la lôr testemoneance, la bestie ch’e ven sù dal Abìs si butarà cuintri di lôr, ju vinçarà e ju coparà. 8I lôr cuarps a saran esponûts su la place de grande citât, che spirtualmentri e à non Sodome e Egjit, juste là che il lôr Signôr al è stât metût in crôs. 9Oms di ogni popul, tribù, lenghe e gjernazie a viodaran i lôr cuarps par trê dîs e mieç e no lassaran che i lôr cuarps a vegnin metûts tun tombâl. 10La int de tiere e fasarà fieste su di lôr, a saran contents e si fasaran regâi, parcè che chescj doi profetis a jerin il torment de int de tiere.

11Ma passâts trê dîs e mieç, Diu ur soflà intor il spirt de vite, che ju tornà a meti in pîts cun grant spac di chei ch’a jerin li a cjalâju. 12Alore a sintirin dal cîl un grant berli: “Lait sù!”, e a lerin sù in cîl tun nûl sot i vôi dai lôr nemîs. 13Juste in chel al capità un grant taramot ch’al sdrumà la decime part de citât: in chel taramot a muririn in siet mil di lôr. Chei ch’a jerin restâts, ducj scaturîts, a laudarin il Diu dal cîl.

14Cussì al passà ancje il secont “Puars mai vualtris!”; e ve ch’al capità il tierç “Puars mai vualtris”.

La setime trombe

15Al sunà la trombe il setim agnul e il cîl si jemplà di vosonis tremendis ch’a disevin:

“Il ream dal mont

al è dal Signôr nestri e dal so Crist;

lui al regnarà tai secui dai secui”.

16Alore i vincjecuatri viei sentâts sui lôr scagns denant di Diu,

si butarin cu la muse par tiere e laudarin Diu disint:

17“Nô ti ringraciìn,

Signôr Diu, paron di dut,

che tu sês e che tu jeris,

parcè che tu âs metude man a la tô grande potence

e tu âs metût in pîts il to ream.

18I paians si jerin sustâts

ma e je rivade l’ore dal to svindic,

il timp di judicâ i muarts,

di dâur il merit ai tiei fameis,

ai profetis e ai sants

e a ducj chei ch’a àn teme dal to non,

piçui e grancj,

e di fâle finide cun chei

ch’a fìschin la tiere”.

19Alore si daviergè il santuari di Diu tal cîl, e tal santuari e comparì l’arcje dal pat. A tacarin po folcs, berlis, tons, taramot e une tampieste di chês.