APOCALìS (8;9)

Letôr: Laura Placereani

Lis preieris dai sants

81Cuant che l’Agnel al rompè il setim sigjîl, si fasè in cîl un grant cidinôr, par une miezore. 2O viodei che ai siet agnui ch’a stavin impilâts denant di Diu ur forin dadis siet trombis.

3Po al rivà un altri agnul e si fermà denant dal altâr, cuntun turibul d’aur in man. I forin dâts une vore di bonodôrs par che ju ufrìs insieme cu lis preieris di ducj i sants brusantju sul altâr d’aur ch’al jere denant de sente. 4E de man dal agnul il fum dal bonodôr al lè sù denant di Diu, insieme cu lis preieris dai sants. 5Daspò l’agnul al cjolè il turibul, lu jemplà cu lis boris cjoltis sul altâr e lu butà su la tiere. A capitarin tons, berlis, folcs e scjassadis di taramot.

I flagjei des primis cuatri trombis

6I siet agnui ch’a vevin lis siet trombis si prontarin par sunâlis. 7A pene che il prin al tacà a sunâ la trombe, e vignì jù su la tiere tampieste e fûc miscliçât cul sanc. La tierce part de tiere e fo arsinide, la tierce part dai arbui a lerin in cinise e dute la jerbe verde si secjà.

8Al sunà la trombe il secont agnul: e fo butade tal mâr come une grande mont di fûc. La tierce part dal mâr si tramudà in sanc, 9la tierce part des creaturis dal mâr e murì e la tierce part des nâfs e lè in sfas.

10Al sunà la trombe il tierç agnul e dal cîl e colà jù une grande stele, infogade tant che un boreç, e e plombà su la tierce part dai flums e su lis risultivis des aghis. 11La stele e à non “Arsinç”; la tierce part des aghis si tramudà in arsinç e un stragjo di int e murì par colpe di chês aghis, ch’a jerin deventadis maris.

12Al sunà la trombe il cuart agnul e la tierce part dal soreli, la tierce part de lune e la tierce part des stelis a forin ofindudis e si scuririn: la dì e pierdè la tierce part dal so lusôr e compagn la gnot.

13Daspò o viodei e o sintii un’acuile ch’e svolave adalt tal cîl e e berghelave ad alte vôs: “Puars, puars, puars mai lôr chei ch’a son su la tiere cuant ch’a sintaran i ultins suns de trombe che i trê agnui a stan par sunâ!”.

La cuinte trombe

91Al sunà la trombe il cuint agnul e o viodei une stele ch’e colave dal cîl su la tiere. I fo dade la clâf dal poç dal Abìs; 2al viergè il poç dal Abìs e dal poç e vignì sù une fumarisse come il fum di une grande fornâs, ch’al scurì il soreli e l’aiar. 3Dal fum a saltarin fûr zupets, che si sparniçarin su la tiere; ur fo dade une virtût compagne di chê dai sgarpions de tiere. 4E ur fo ordenât di no dâ damp ni a la jerbe ni ai sterps ni ai arbui ma dome ai oms che no vevin il sigjîl di Diu sul cerneli. 5Però no ur fo dât di copâju, ma dome di lambicâju par cinc mês, e il lambic al è come il lambic dal sgarpion cuant ch’al beche un om. 6In chei dîs i oms a ciraran la muart ma no le cjataran; a bramaran di fâle finide, ma la muart ur fuirà.

7Chescj zupets a semeavin cjavai pronts par lâ in vuere. Sul cjâf a vevin zois ch’a semeavin d’aur e a vevin une filusumie usance chê dai oms. 8A vevin cjavei come cjavei di femine, ma la lôr dintidure e jere edentiche di chê dai leons. 9A vevin la panze come une corace di fier e il sunsûr des lôr alis al jere tant che il fracàs di cjars strissinâts di une sdrume di cjavai cuant ch’a van al assalt. 10A vevin codis come di sgarpions, cun asei. Te lôr code a vevin la virtût di fâ tribulâ i oms par cinc mês. 11Il lôr re al jere l’agnul dal Abìs, che par ebraic si dîs Abadon, par grêc invezit Apolion.

12Il prin “Puars mai vualtris!” al è passât. Int reste ancjemò doi daûr di chest.

La seste trombe

13Al sunà la trombe il sest agnul. Alore o sintii une vôs ch’e vignive dai cjantons dal altâr d’aur ch’al è denant di Diu. 14E i diseve al sest agnul ch’al veve la trombe: “Dislee i cuatri agnui incjadenâts tal grant flum, l’Eufrât”. 15A forin disleâts i cuatri agnui pronts pa l’ore, pal dì, pal mês e pal an a fiscâ la tierce part dai oms. 16Il numar dai soldâts a cjaval al jere di dusinte milions; o sintii il numar precîs. 17Cussì mi comparirin i cjavai e i cjavalîrs: cu lis coracis di fûc, di gjacint e di solfar. I cjâfs dai cjavai a jerin come i cjâfs dai leons, e de lôr bocje al saltave fûr fûc, fum e solfar. 18Cun chescj trê flagjei, cul fûc, cul fum e cul solfar ch’al saltave fûr de lôr bocje, e fo maçade la tierce part dai oms. 19La vigorie dai cjavai e sta di fat te lôr bocje e tes lôr codis; lis lôr codis a semein madracs, cun tant di cjâf, e cun chel a fasin mâl.

20Chei oms che no muririn par colpe di chescj flagjei, no molarin gran lis voris des lôr mans; no lassarin di ingenoglâsi denant dai demonis e dai dius d’aur, di bronç, di clap e di len, che no puedin ni viodi ni sintî ni çugnâsi; 21no lassarin nancje di copâ ni di lâ daûr dai striaments ni di fâ porcariis ni di robâ.