APOCALìS (6;7)

Letôr: Silvia Placereani

I siet sigjîi

61Cuant che l’Agnel al rompè il prin dai siet sigjîi, o viodei e o sintii il prin dai cuatri nemâi ch’al berlave cuntune vosone come di ton: “Ven!”. 2E ve che mi comparì un cjaval blanc e chel che lu montave al veve un arc; i fo dade une zoe e al jessì come un ch’al à vinçût e ch’al è seneôs di vinci ancjemò.

3Cuant che l’Agnel al rompè il secont sigjîl, o sintii il secont nemâl ch’al berlave: “Ven!”. 4Alore al jessì un altri cjaval, colôr fûc. A di chel che lu montave i fo dât il podê di gjavâ la pâs de tiere par che si sbudielassin un cul altri e i fo consegnade une grande spade.

5Cuant che l’Agnel al rompè il tierç sigjîl, o sintii il tierç nemâl ch’al berlave: “Ven!”. E ve che mi comparì un cjaval neri e chel che lu montave al veve te man une belance. 6E o sintii une vôs ch’e berghelave framieç dai cuatri nemâi: “Une misure di forment par un denâr e trê misuris di vuardi par un denâr! Il vueli e il vin che no ledin strassâts”.

7Cuant che l’Agnel al rompè il cuart sigjîl, o sintii la vôs dal cuart nemâl ch’al diseve: “Ven!”. 8E ve che mi comparì un cjaval verdaç. Chel che lu montave al veve non Muart e i vignive daûr chel altri mont. Al fo dât a lôr podê su la cuarte part de tiere par fiscâle cu la spade, cu la fan, cu la peste e cu lis besteatis de tiere.

9Cuant che l’Agnel al rompè il cuint sigjîl, o viodei sot dal altâr lis animis di chei ch’a forin copâts par colpe de peraule di Diu e de testemoneance che i vevin dade. 10E a berlarin a fuart:

“Fin cuant mo, paron di dut,

tu che tu sês sant e vêr,

no fasarâstu sentence

e no ti svindicarâstu dal nestri sanc

cuintri di chei ch’a vivin su la tiere?”.

11Alore ur fo dât a ognidun di lôr un vistît blanc e ur fo dit di vê pazience ancjemò par un pôc, infinamai che il numar dai lôr compagns di servizi e dai lôr fradis ch’a vevin di jessi copâts nol fos stât complet.

12Cuant che l’Agnel al rompè il sest sigjîl, o viodei a capitâ un taramot d’inglaçâsi. Il soreli al deventà neri tant che un sac di grene, la lune e deventà edentiche dal sanc, 13lis stelis dal cîl a plombarin parsore de tiere come cuant che un fiâr, scjassât dal burlaç, al lasse colâ i fîcs malmadûrs. 14Il cîl si invuluçà come cuant che si rodole sù un volum e dutis lis monts e lis isulis a forin dislidrisadis dal lôr sît. 15Alore i rês de tiere e i grancj, i graduâts, i siôrs e i potents, e ogni om, sotan o libar, a lerin a parâsi ducj tai landris e jenfri lis cretis des monts; 16e ur diserin a lis monts e a lis cretis: Colait parsore di nô e plataitnus de muse di chel ch’al è sentât su la sente e de rabie dal Agnel, 17parcè che e je rivade la grande zornade de lôr rabie e cui rivaraial adore di tignî dûr?

I 144.000 marcâts

71Podopo o viodei cuatri agnui ch’a stavin tai cuatri cjantons de tiere e a tignivin frenâts i cuatri aiars par no ch’a svintassin su la tiere ni sul mâr ni su nissune plante. 2Po o viodei un altri agnul ch’al leve sù de jevade e al veve il sigjl dal Diu vîf. E ur berlave a grande vôs ai cuatri agnui che ur jere stât dât il podê di fiscâ la tiere e il mâr: 3“No stait a fiscâ ni la tiere ni il mâr ni lis plantis fintremai che no varìn marcât il sigjîl dal nestri Diu sul cerneli dai siei servidôrs”. 4Podopo o sintii il numar di chei ch’a jerin stâts marcâts cul sigjîl: cent e corantecuatri mil, marcâts di ogni tribù dai fîs di Israel:

5de tribù di Gjude dodismil;

de tribù di Ruben dodismil;

de tribù di Gad dodismil;

6de tribù di Aser dodismil;

de tribù di Neftali dodismil;

de tribù di Manasse dodismil;

7de tribù di Simeon dodismil;

de tribù di Levi dodismil;

de tribù di Issacar dodismil;

8de tribù di Zabulon dodismil;

de tribù di Josef dodismil;

de tribù di Beniamin dodismil.

La schirie cence numar dai elets

9Podopo al comparì un stragjo di int, tante che nissun nol rivave a contâle, di ogni gjernazie e tribù e popul e lenghe. A stavin ducj in pîts denant de sente e denant dal Agnel, vistûts a blanc e cu lis palmis tes mans. 10E a berlavin a grande vôs:

“La salvece e je dal nestri Diu sentât su la sente e dal Agnel!”.

11Alore ducj i agnui ch’a jerin di ca e di là de sente e i viei e i cuatri nemâi si butarin in genoglon cu la muse par tiere denant de sente e a laudarin Diu disint:

12“Amen! Laut, glorie, sapience, agrât, onôr, potence e fuarce al nestri Diu tai secui dai secui. Amen”.

13Alore un dai viei si voltà viers di me e mi disè: “Chei vistûts a blanc cui sono e dontri vegnino?”. 14I rispuindei: “Paron, tu lu sâs tu”. E lui: “A son chei ch’a son passâts pe grande tribulazion e a àn lavâts e fats deventâ cjandits i lôr vistîts cul sanc dal Agnel. 15Par chel a stan denant de sente di Diu e lu servissin dì e gnot tal so santuari; e chel ch’al è sentât su la sente al slargjarà la sô tende parsore di lôr.

16No varan altri fan,

no varan altri sêt,

no ju ofindarà il soreli

ni arsetât di sorte

17parcè che l’Agnel ch’al sta tal mieç de sente

al sarà il lôr pastôr

e ju menarà a lis risultivis de aghe de vite.

E Diu al suiarà ogni lagrime dai lôr vôi”.