APOCALìS (4;5)

Letôr: Edoardo Placereani

Seconde part: Sezion profetiche

lis robis chE a capitaran

La cort dal cîl

41Podopo mi capità une vision. Une puarte e jere spalancade tal cîl. La vôs ch’o vevi sintude prin a fevelâ tant che une trombe mi diseve: Monte sù ca sù; ti fasarai viodi lis robis ch’a varan di capitâ plui indenant. 2A bot e sclop mi cjatai brincât dal Spirt. E ve là sù, tal cîl, une sente, e su la sente al jere sentât un. 3Chel ch’al jere sentât al semeave, cjalantlu, di jasp e di aghite rosse. Tal cîl, un arc precîs dal smeralt al contornave la sente. 4Di ca e di là de sente a jerin vincjecuatri scagns e sui scagns a stavin sentâts vincjecuatri viei vuluçâts di blanc cun siet zois d’aur sul cjâf. 5De sente a vignivin fûr lamps, vôs e tons; denant de sente a jerin impiâts siet lusôrs, ch’a rapresentavin i siet spirts di Diu. 6Denant de sente al jere come un mâr stralusint, usance il cristal. Tal mieç de sente e di ca e di là de sente a jerin cuatri nemâi cjamâts di vôi par denant e par daûr. 7Il prin nemâl al jere a uso un leon, il secont nemâl al semeave un vidiel, il tierç nemâl al veve la filusumie di om, il cuart nemâl al jere sul stamp di un’acuile cuant ch’e svole. 8I cuatri nemâi a àn sîs alis parom, torator e dentri vie a son fodrâts di vôi, dì e gnot no sostin di dî:

Sant, sant, sant

il Signôr Diu, paron di dut,

Chel ch’al jere, al è e al sta rivant.

9E ogni volte che chescj nemâi i davin glorie e onôr e ringraciament a di chel ch’al è sentât su la sente e al vîf tai secui dai secui, 10i vincjecuatri viei si butavin in genoglon denant di chel ch’al è sentât su la sente e a laudavin chel ch’al vîf tai secui dai secui e a butavin lis lôr zois denant de sente, disint:

11“Signôr e Diu nestri, tu mertis propit

di vê la glorie, l’onôr e il comant,

parcè che tu âs fatis dutis lis robis,

e par volontât tô

a son stadis creadis e a stan sù”.

Il libri dai siet sigjîi

51E o viodei te man drete di chel ch’al jere sentât su la sente un libri rodolât, scrit par dentri e par fûr, sigjilât cun siet sigjîi. 2O viodei un agnul fuart ch’al berlave ad alte vôs: “Cui isal degn di viergi il libri e di tirâ vie i siei sigjîi?”. 3Ma nissun, ni in cîl ni in tiere ni sot tiere, nol jere in stât di viergi il libri e di leilu. 4Jo o vaivi di dûr vaî parcè che no ’nd jere un ch’al ves mertât di viergi il libri e di leilu. 5Un dai viei mi disè: “Finissile di vaî; al à vinçût il leon de tribù di Gjude, il sfiol di David, e al vierzarà il libri e i siet sigjîi”.

L’Agnel come sacrificât

6Daspò o viodei impilât tal mieç de sente e cerclât dai cuatri nemâi e dai viei un Agnel, come copât. Al veve siet cuars e siet vôi, ch’a rapresentin i siet spirts che Diu al à mandât su la tiere. 7L’Agnel al rivà e al cjolè il libri de man drete di chel ch’al jere sentât su la sente. 8Nancje finît di cjolilu, i cuatri nemâi e i vincjecuatri viei si butarin in genoglon denant dal Agnel, ognidun cuntune arpe e cun copis d’aur plenis di bonodôr, ch’a son lis preieris dai sants. 9A cjantavin un cjant gnûf:

“Tu tu sês degn di cjapâ in man il libri

e di viergi i siei sigjîi,

parcè che tu sês stât copât

e tu âs riscatât par Diu a mieç dal to sanc

oms di ogni tribù, lenghe, popul e gjernazie

10e tu ju âs fats pal nestri Diu

un ream di predis

e a regnaran su la tiere”.

11Intant de vision, o sintii vôs di une sdrume di agnui torator de sente e dai nemâi e dai viei. Il lôr numar al jere di miârs e miârs 12e a disevin a grande vôs:

“L’Agnel ch’al è stât copât

al merte di vê potence e ricjece,

sapience e fuarce,

onôr, glorie e laut”.

13Dutis lis creaturis dal cîl e de tiere, sot de tiere e tal mâr e dut ce ch’al jere dentri, lis sintii ch’a disevin:

“A di chel ch’al è sentât su la sente e al Agnel

laut, onôr, glorie e potence

tai secui dai secui”.

14E i cuatri nemâi a disevin: “Amen”. E i viei si butarin in genoglon par laudâ.