GJUDE (1)

Letôr: Paola Antares

Letare di Gjude

Direzion e salût

1Gjude, servidôr di Gjesù Crist, fradi di Jacum, ai sielzûts ch’a vivin tal amôr di Diu Pari e a son stâts vuardâts par Gjesù Crist: 2remission a vualtris e pâs e amôr fint avonde.

I fals mestris

3Miei cjârs, o vevi une gole tremende di scrivius a rivuart de nestre salvece, ma o ài scugnût fâlu par sburtâus a lotâ pe fede ch’e je stade contade ai sants une volte par simpri. 4A son rivâts a intropâsi framieç di vualtris un pôcs di lôr – za marcâts dopomai par cheste condane –, cence religjon, ch’a cjatin un rimpin a lis lôr porcariis te gracie dal nestri Diu, dineant il nestri unic paron e Signôr Gjesù Crist.

5O vuei ricuardâus a vualtris, ch’o cognossês za dutis chestis robis, che il Signôr, dopo di vê salvât il popul de tiere dal Egjit, al à parât in fruç chei che no àn volût crodi, 6e chei agnui che no àn tignût cont dal lôr onôr ma a àn lassade la lôr sente, lui ju ten peâts cun cjadenis eternis, tal scûr, pal judizi de grande zornade. 7Cussì ancje Sodome e Gomore e lis citâts dulintor, che si son lassadis lâ a lis stessis porcariis e si son butadis tai vizis cuintri nature, a stan patint lis penis di un fûc eterni, par ch’a sedin di spieli.

8Ancje chei chi a son compagns: sburtâts dai lôr çavariaments, a sporcjin il lôr cuarp, a butin di bande il Signôr e a blestemin lis gloriis. 9E l’arcagnul Micjêl, cuant ch’al barufave cul diaul par vê il cuarp di Mosè, nol à olsât a fâi cuintri cun brutis peraulis ma i à dit: Che il Signôr ti condani! 10Chei chi invezit a blestemin dut ce che no cognossin; e dut ce ch’a cognossin naturalmentri, tant che nemâi cence lum di reson, ur servìs par finî di ruvinâsi. 11Puars mai lôr! A àn cjapade la strade di Cain e, pe gole dai bêçs, si son impeolâts tai disordins di Balaam e a son lâts a finîle te rivolte di Kore. 12A son il disonôr dai vuestris gustâs parcè che si sentin in taule cence nissun rivuart, passintsi fûr di misure. A son tant che nûi cence ploe menâts vie dai aiars, o arbui cence pomis sul finî de stagjon, muarts dôs voltis, dislidrisâts. 13A son come ondis salvadiis dal mâr, ch’a mostrin la sbrume des lôr porcariis; come stelis cence fermece, ch’a àn par distin un scûr penç pa l’eternitât.

14Ancje par lôr al à profetât Enoc, setim dopo di Adam, cuant ch’al à dit: “Ve, il Signôr al è vignût cui siei miârs di miârs di agnui par fâ sentence cuintri di ducj, 15e par svergognâ ducj i triscj di dutis lis voris di inicuitât ch’a àn fat e di dutis lis ofesis che pecjadôrs cence religjon a àn dit cuintri di lui”. 16A son stiçadôrs plens di asse, ch’a operin seont lis lôr vois; la lôr bocje e bute fûr peraulis di supierbie e a lengin lis personis pai lôr interès.

Esortazion a la comunitât

17Vualtris però, miei cjârs, tignît a ments dutis chês robis che i apuestui dal Signôr nestri Gjesù Crist us àn visâts denant trat. 18Lôr ur disevin: “Te ultime ete a rivaran i bausârs, ch’a laran indenant seont lis lôr vois orendis”. 19A son chei ch’a semenin divisions, int matereâl, cence Spirt.

20Vualtris però, miei cjârs, fasêt sù la vuestre cjase spirtuâl parsore de vuestre fede une vore sante, preait midiant dal Spirtu Sant, 21restait tal amôr di Diu, spietant il boncûr dal Signôr nestri Gjesù Crist pe vite eterne. 22Chei ch’a clopin cirît di persuadiju, 23chei altris cirît di gjavâju dal fûc; a chei altris ancjemò cirît di puartâur un amôr plen di timôr, tignintsi vuardâts parfin dal vistît sporcjât de lôr cjar.

Dossologjie di conclusion

24A di chel ch’al pò vuardâus di ogni colpe e fâus comparî denant de sô glorie cence pecjis e in gjonde, 25al unic Diu, nestri salvadôr, midiant di Gjesù Crist nestri Signôr, glorie, maiestât, fuarce e potence nant di dutis lis etis, cumò e simpri. Amen!