3 ZUAN (1)

Letôr: Silvia Tondon

Tierce letare di Zuan

Salût di jentrade

1Jo, il predi, al cjâr Gaio, che i vuei ben te veretât. 2Cjâr, ti auguri ch’al ledi dut ben e che tu stedis ben tal cuarp come che tu stâs ben ta l’anime.

L’autôr al laude Gaio

3Mi si è slargjât il cûr cuant che a son rivâts un pôcs di fradis e mi àn contât che tu sês te veretât, che tu vâs indenant te veretât. 4No ài gjonde plui grande di cheste, di savê che i miei fîs a van indenant te veretât.

5Cjâr, tu sês fedêl in dut ce che tu fasis pal ben dai fradis, seben ch’a son forescj. 6Lôr a àn testemoneât dal to amôr denant de glesie, e tu fasarâs ben a procurâur dut ce che ur covente pal viaç, come che Diu comande. 7Parcè che a son partîts par amôr dal non di Crist, cence cjapâ nuie dai paians. 8Par chel nô o vin di viergiur la puarte e il cûr a int di cheste fate, par dâur une man in ce ch’a fasin pe veretât.

Condote di Diotrefe e racomandazion di Demetri

9O ài scrit alc a la glesie ma Diotrefe, ch’al smicje il prin puest framieç di lôr, nol vûl vierginus la puarte. 10Par chel, s’o vignarai, i puartarai denant dut ce ch’al sta cumbinant, fevelant mâl cuintri di nô cun cjacaris brutis dome avonde. Nancjemò no content, ni che ur vierç lui la puarte ai fradis ni che ur al lasse fâ a di chei ch’a volaressin e ju pare fûr de glesie.

11Cjâr, no sta lâ daûr dal mâl ma dal ben. Chel ch’al fâs il ben al è di Diu; chel ch’al fâs il mâl nol à viodût Diu.

12Rivuart a Demetri, ducj a testemonein di lui, comprendude la stesse veretât; ancje nô o fasìn di testemonis sul so cont e tu sâs che la nestre testemoneance e je vere.

Peraulis di cumiât

13Int varès tantis di scriviti, ma no mi va di fâlu cul ingjustri e cul penâl. 14O speri però di vioditi in curt e si fevelarìn a bocje.

15La pâs cun te. Ti saludin i amîs. Salude ancje tu i amîs un par un.