2 PIERI (3)

Letôr: Elisabetta Danielis

Esortazion conclusive:

la parusie e il compuartament dal cristian in gjenerâl

31Miei cjârs, cheste e je za la seconde letare che us scrîf, e in dutis dôs o cîr di tornâ a sveâ cun racomandazions il vuestri bon sintiment, 2par ch’o tignîs a ments lis peraulis ch’a àn ditis i sants profetis e il comandament dal Signôr e salvadôr che us àn lassât i apuestui.

3Prin di dut o vês di savê che, tai ultins dîs, a vignaran fûr cjacarons plens di batule, ch’a laran daûr des lôr passionatis 4e a disaran: “Dulà ise po la promesse ch’al tornarà? De dì che i nestris vons a àn sierât i vôi, al reste dut come tal imprin ch’al è stât creât il mont”. 5Lôr però a fasin a pueste a dismenteâsi che i cîi a jerin dopomai e che la tiere, vignude fûr da l’aghe e tal mieç da l’aghe, e à vût il so prin stamp in gracie de peraule di Diu; 6e che par chescj stes cantins il mont d’in chê volte al è lât disfat, taponât da l’aghe. 7I cîi e la tiere di cumò a son tignûts sù de stesse peraule e metûts di bande pal fûc de dì dal judizi e de fin dai triscj.

8Une robe però no vês di pierdile di voli, miei cjârs: denant dal Signôr une zornade e je tant che mil agns e mil agns a son tant che une zornade sole. 9Il Signôr no si inclape tal mantignî ce ch’al à imprometût, come ch’al scrupule cualchidun; ma al dopre pazience cun vualtris parcè che nol vûl ch’al vedi di pierdisi nissun ma che ducj a vedin mût di mendâsi. 10La zornade dal Signôr e vignarà tant che un lari. In chê volte i cîi a passaran cun grant fracàs: lis robis, consumadis dal calôr, si dislidaran e la tiere cun dut ce ch’e à dentri e sarà fiscade.

11Stant che dutis chestis robis a àn di sfruçonâsi, trop sante e plene di religjon no àe di jessi la vuestre vite, 12biel ch’o spietais e o corês incuintri a la vignude de zornade dal Signôr, cuant che i cîi si disfasaran e lis robis si fondaran pal grant fûc! 13E po, daûr de sô promesse, nô o spietìn cîi gnûfs e une tiere gnove, là che la justizie e sarà di cjase par simpri.

14Alore, miei cjârs, intant ch’o spietais chescj fats, cirît di jessi cence magle e cence pecjât denant di Diu, in pâs. 15Il boncûr dal nestri Signôr cjapaitlu tant che salvece, come che us à scrit ancje il nestri cjâr fradi Pauli cun chel sintiment ch’al à vût in don; 16lui al fâs cussì in dutis lis letaris là ch’al trate di chestis robis. And è dentri cualchi pont che si stente a capîlu e che i ignorants e i malsigûrs lu voltin, al impâr di chês altris Scrituris, a lôr damp.

17Vualtris duncje, miei cjârs, ch’o sês stâts visâts denant trat, stait in vuaite par no discjadi de vuestre fermece, strissinâts ancje vualtris de falsetât dai triscj. 18Cressêt invezit te gracie e te cognossince dal Signôr nestri e salvadôr Gjesù Crist. A lui la glorie cumò e te dì de eternitât. Amen!