2 PIERI (2)

Letôr: Antonello Bassi

Cuintri dai fals mestris

21And è stâts tal popul fals dotôrs, come ch’a saran framieç di vualtris mestris fals ch’a vignaran fûr cun eresiis periculosis, dineant il Signôr che ju à sfrancjâts e tirantsi intor une fin no lontane. 2Une vore di lôr ur laran daûr tes lôr porcariis e par colpe lôr la vie de veretât e sarà svilanade. 3Te lôr brame us dopraran cun peraulis falsis; ma la lôr condane dopomai ch’e je in vore e la lôr fin e je in paisse.

4Di fat Diu nol à sparagnât i agnui ch’a vevin pecjât, ma ju à sprofondâts tes sfondaris scuris dal infier, là ch’a son metûts di bande pe sentence; 5nol à sparagnât nancje il mont di une volte, seben ch’al à salvât Noè cursôr di justizie, e altris siet cun lui, biel ch’al faseve plombâ il diluvi suntun mondat cence religjon; 6al à condanât a la distruzion lis citâts di Sodome e di Gomore, parantlis in cinise e lis à metudis di spieli par chei ch’a varessin vivût malamentri. 7Invezit al à liberât Lot, ch’al jere just e al penave pe vite selerade di chei sporcacjons. 8Chel om just, di fat, par chel ch’al viodeve e al sintive vivint framieç di lôr, si tormentave ogni dì te sô anime juste par colpe di chês robatis. 9Il Signôr al sa tirâ fûr de prove i bogns e meti di bande i triscj pal cjastic te dì dal judizi, 10soredut chei che, tes lôr vois sporcjis, a van daûr de cjar e a sbelein il Signôr.

Spavalts, sfaçâts, no àn pôre di svilanâ lis gloriis, 11cun dut che i agnui, plui grancj di lôr par fuarce e par potence, no puartin denant dal Signôr nissun judizi ni ofese cuintri di lôr. 12Ma chei li, tant che nemâi cence sintiment, nassûts e distinâts a jessi cjapâts e fiscâts, a blestemin ce che no cognossin e a saran fruçâts tal lôr disordin, 13patint il cjastic come pae de inicuitât. Si crodin contents par vê gjoldût une dì; a son rude sporcjetât e vergogne; a gjoldin dai lôr imbrois, fasintjus biele muse; 14a àn i vôi fodrâts di bramis orendis e no àn mai pecjât avonde, a tirin lis animis clopadicis, a àn il cûr ingort fûr di misure, fîs di maludizion! 15Bandonade la strade drete, si son pierdûts lant pal troi di Balaam, fi di Bosor, ch’al smicjave une pae pe sô inicuitât 16ma ch’al à vût il cjastic de sô tristerie: une musse cence peraule, fevelant cun vôs umane, al à inibide la matetât dal profete. 17Chei li a son come risultivis cence aghe e come nûi parâts indenant dal aiar; il lôr distin al è il scûr. 18Cui lôr discors sglonfâts di nuie, a tornin a tirâ dongje, a mieç des vois socis de cjar, chei che si jerin juste slontanâts di chei ch’a vivin fûr di strade. 19Ur imprometin libertât, cu la cuâl che lôr par prins a son sclâfs des porcariis. Parcè che un al è sclâf di ce che lu parone.

20Di fat se, dopo di jessi fuîts des porcariis dal mont midiant de cognossince dal Signôr e salvadôr Gjesù Crist, a tornin a jessi indaûr impeolâts e sotans, la lôr cundizion di cumò e je cetant piês che no la prime. 21Al sarès stât miei par lôr di no vê nancje cognossude la strade de justizie pluitost di voltâi lis spalis, dopo di vêle cognossude, al sant comandamet che ur jere stât dât. 22Al è deventât vêr par lôr il sproc:

Il cjan al è tornât daprûf di ce ch’al veve gomitât

e la purcite monde e nete e je tornade a voltolâsi tal ledan.