2 PIERI (1)

Letôr: Francesca Garbuio

Seconde letare di Pieri

Salût e direzion

11Simon Pieri, servidôr e apuestul di Gjesù Crist, a di chei ch’a àn vude, midiant de justizie dal nestri Diu e salvadôr Gjesù Crist, une fede tant preseade de nestre: 2gracie e pâs a vualtris in misure bondant te cognossince di Diu e di Gjesù Crist nestri Signôr.

L’insegnament di Pieri: clamade e sielte dal cristian

3La sô potence divine nus à regalât ogni sorte di ben a rivuart de vite e de religjon, fasintnus cognossi chel che nus à clamâts cu la sô glorie e cu la sô potence. 4Tal stes timp nus à dadis ancje lis robis grandononis e preseadis ch’a jerin stadis imprometudis par ch’o cjapassis part de vite stesse di Diu dopo di jessi scjampâts dal mâl ch’al è tal mont par colpe des bramis. 5Par chel metêtle dute par zontâ a la vuestre fede une buine condote, a une buine condote la cognossince, 6 a la cognossince il savêsi misurâ, al savêsi misurâ il tignî dûr, al tignî dûr la religjon, 7 a la religjon l’amôr fra fradis, al amôr fra fradis l’amôr di Diu. 8Se chestis robis a son in vualtris in misure bondant, no us lassaran cence fâ nuie e cence profit a rivuart de cognossince dal Signôr nestri Gjesù Crist. 9Invezit chel che nol à chestis robis, ni ch’al viôt lontan ni dongje e si dismentee ancje di jessi stât smondeât dai siei pecjâts di une volte. 10Par chel, fradis, cirît di rinfuarçâ simpri plui la vuestre clamade e la vuestre sielte. S’o fasarês cussì, no si inçopedarês par mai. 11Di fat us sarà spalancade adimplen la jentrade tal ream eterni dal Signôr nestri e salvadôr Gjesù Crist.

La fonde dal insegnament di Pieri:

l’esperience direte di Crist e la Scriture

12Par chel us batarai simpri sun chestis robis, seben che lis savês za e ch’o sês salts te veretât ch’o vês.

13O crôt ch’al ledi ben, fintremai ch’o sin in cheste tende dal cuarp, di tignîus sveâts cu lis mês racomandazions, 14savint che in curt o scugnarai bandonâ cheste mê tende, come che mi à motivât ancje il Signôr nestri Gjesù Crist. 15E o procurarai che, ancje dopo ch’o sarai lât, o vedis di visâsi di chestis robis.

16Di fat no us vin fat cognossi la potence e la vignude dal Signôr nestri Gjesù Crist par vie ch’o jerin lâts daûr di storiis dadis dongje cun mistîr, ma parcè che o sin stâts testemonis cui nestris vôi de sô grandece. 17Lui al à vût onôr e glorie di Diu Pari cuant che de gloriose maiestât i je rivade cheste vôs: “Chest al è gno Fi, il plui cjâr, e o soi tant content di lui”. 18Cheste vôs nô le vin sintude a vignî jù dal cîl biel ch’o jerin cun lui su la mont sante. 19E cussì o vin une conferme ancjemò plui grande de peraule dai profetis, ch’o fasês ben a tignîle cont tant che un lampion ch’al lûs tun lûc dut scûr fintremai che nol criche il dì e tai vuestris cûrs no jeve la biele stele. 20Tignît a ments soredut chest: nissune profezie de Scriture no je lassade ai sclariments di chel o di chel altri, 21parcè che la profezie no je mai stade puartade par volontât umane, ma chei oms a àn fevelât de part di Diu sburtâts dal Spirt.