1 PIERI (4;5)

Letôr: Mariarosa Depangher

Il patî cristian

41Stant duncje che Crist al à patît te sô cjar, ancje vualtris armaitsi dal stes mût di pensâ. Chel ch’al à patît tal so cuarp, le à finide par simpri cul pecjât, 2par no lâ plui daûr des vois de cjar ma de volontât di Diu tal timp che i reste in cheste vite mortâl. 3Vonde cul timp strassât a passi lis vois dai paians, vivint tes baracadis, tai mangjaçâs, tes cjochis e te religjon fûr di plomp dai idui. 4Par chel ur pâr di strani che no corês ancje vualtris insieme cun lôr viers di chest riul di ruvine e us maltratin. 5Però a varan di rindi cont a di chel ch’al è pront a judicâ i vîfs e i muarts; 6di fat la buine gnove ur è stade contade ancje ai muarts par ch’a vivin seont Diu tal spirt, dopo di vê patide, pierdint la vite dal cuarp, chê condane ch’a son sogjets ducj i oms.

7La fin di dutis lis robis e je dongje. Viodêt duncje di vê sintiment e di savêsi misurâ par atindi a la preiere. 8Soredut mantignît fra di vualtris un grant amôr, parcè che l’amôr al tapone un disordin di pecjâts. 9Tignîtsi la puarte vierte un cul altri, cence bruntulâ. 10Ognidun ch’al vivi seont la gracie ch’al à vude, metintle a disposizion di chei altris, sicu ministradôrs fedêi de gracie di Diu. 11Chel ch’al fevele, che lu fasi come cun peraulis di Diu; chel ch’al servìs, che lu fasi come par un ordin vût di Diu, par che in dut al sedi glorificât Diu midiant di Gjesù Crist. A lui la glorie e la potence tai secui dai secui. Amen.

12Miei cjârs, se si è impiade une persecuzion framieç di vualtris par provâus, no stait a dâsi di maravee come se us fos capitât alc di strani. 13Ma te misure ch’o cjapais part ai patiments di Crist, indalegraitsi parcè che ancje cuant che si pandarà la sô glorie o podarês gjoldi e stâ contents. 14Furtunâts vualtris se us svilanaran par colpe dal non di Crist, parcè che il Spirt de glorie e il Spirt di Diu al polse parsore di vualtris. 15Che nissun di vualtris nol vedi di patî parcè che al è sassin o lari o delincuent o spion. 16Ma se un al patìs parcè che al è cristian, che no si vergogni; che anzit al laudi Diu par chest non.

17Al è rivât di fat il moment ch’al scomence il judizi de cjase di Diu; e s’al scomence di nô, ce fin no fasarano chei ch’a refudin di crodi tal vanzeli di Diu?

18Se il just si salvarà a fîl,

ce no saròial dal om cence religjon e dal pecjadôr?

19Cussì ancje chei ch’a patissin seont la volontât di Diu, che si metin tes mans dal lôr Creadôr, ch’al è di peraule, e ch’a ledin indenant fasint il ben.

Racomandazions al popul di Diu

51Ur racomandi ai predis ch’a son fra di vualtris, predi ancje jo come lôr, testemoni dai patiments di Crist e a part de glorie ch’e à di pandisi: 2passêt il trop che us è stât dât in consegne; tignîtlu di voli no par fuarce ma vulintîr, seont Diu; no par un interès vergognôs ma par une brame dal cûr; 3no fasint i prepotents su lis personis che us son stadis dadis in consegne ma deventant un spieli par dut il trop. 4E cuant che si pandarà il prin dai pastôrs, o varês la zoe de glorie che no si flapìs.

5Ancje vualtris mo, zovins, stait sotponûts ai anzians. Vistîtsi di umiltât un par chel altri, parcè che

Diu ur ten dûr ai supierbeôs

ma a di chei che si sbassin ur dà la sô gracie.

6Pleaitsi duncje sot la man potente di Diu, par che us alci tal moment just 7e butait in lui ogni vuestri fastidi, parcè che al viôt lui di vualtris. 8Viodêt di savêsi misurâ e di stâ in vuaite. Il vuestri nemì, il diaul, al baline torator tant che un leon ch’al rugne, smicjant di glotius. 9Frontaitlu salts in te fede, savint che i vuestris fradis sparniçâts pal mont a patissin lis vuestris stessis passions.

10Cuant ch’o varês patît un pôc, il Diu di ogni gracie, che us à clamâts a la sô glorie eterne in Crist, us tornarà a meti in pîts, us rinsaldarà, us darà fuarce e tignince. 11A lui la potence tai secui. Amen!

Salût finâl

12Us ài scritis chestis pocjis robis par mieç di Silvan, che jo lu riten un fradi fedêl, par dâus spirt e par sigurâus che cheste e je la vere gracie di Diu. Stait grampâts tor di jê! 13Us salude la comunitât ch’e je stade sielzude come vualtris e ch’e vîf in Babilonie, e ancje Marc, gno fi. 14Saludaitsi un cul altri cuntune bussade di amôr. Pâs a ducj vualtris ch’o sês in Crist.