EBREUS (8)

Letôr: Ilaria Anna Colussi

La perfezion dal ministeri sacerdotâl di Crist

81La sostance di ce ch’o stin disint e je cheste: o vin un prin predi cussì grant che si è sentât a la gjestre de sente de maiestât intai cîi, 2servidôr dal santuari e de vere tende che le à fate il Signôr e no un om.

3Di fat ogni prin predi al è metût par ufrî regâi e sacrificis; partant ancje lui al scuen vê alc di ufrî. 4Se Gjesù al fos su la tiere, nol sarès nancje predi, parcè che and è ch’a ufrissin regâi seont la leç. 5Chei li però a stan fasint un servizi ch’al è une copie e un’ombre des realtâts dal cîl, stant a ce che Diu i à dit a Mosè cuant ch’al jere daûr a fâ sù la tende: Viôt, dissal, di fâ dut seont il stamp che ti è stât mostrât su la mont.

6Cumò invezit lui al à vude une incariche cetant plui splendide par vie ch’al è deventât mediatôr di un pat une vore miôr, fondât sun promessis plui grandis. 7Parcè che se il prin al fos stât perfet, nol jere il câs di fânt un altri. 8E di fat Diu, rimproverant il so popul, al dîs:

Ve ch’a vignaran zornadis, al dîs il Signôr,

ch’o fasarai cu la cjase di Israel

e cu la cjase di Gjude

un pat gnûf;

9no come il pat ch’a àn fat i lôr vons

la dì che ju ài cjapâts pe man

par fâju saltâ fûr de tiere dal Egjit;

stant che lôr no àn tignût fede al gno pat,

nancje jo no ài bacilât plui par lôr, al dîs il Signôr.

10E chest al è il pat ch’o fasarai cu la cjase di Israel

dopo di chei dîs, al dîs il Signôr:

o metarai lis mês leçs intal lôr cjâf

o lis stamparai tai lôr cûrs;

jo o sarai il lôr Diu

e lôr a saran il gno popul.

11Nol coventarà che nissun no i insegni al so paisan

e nancje al propi fradi, disint:

Cognòs il Signôr!

Di fat ducj mi cognossaran,

dal plui piçul al plui grant

12Parcè che jo o perdonarai lis lôr inicuitâts

e no mi visarai plui dai lôr pecjâts.

13Fevelant però di pat gnûf, Diu al à dit a clâr ch’al è invecjît il prin; ce ch’al devente vieri e antîc, no i mancje trop a sparî.