1 TIMOTEU (4;5)

Letôr: Marco Delle Vedove

Cuintri dai fals dotôrs

41Il Spirt però al dîs clâr che tai ultins timps un pôcs di lôr a bandonaran la fede, lant daûr di spirts ingjanadôrs e di dutrinis diabolichis, 2imbroiâts de falsetât di int ch’e semene dome bausie, che e à la cussience come marcade cuntun fiêr sbrovent. 3Int che e improibìs di maridâsi e e comande di no mangjâ certis robis, che invezit Diu lis à creadis par ch’a fossin dopradis cuntun cûr plen di agrât dai fedêi e di chei ch’a àn cognossude la veretât. 4Di fat dut ce che Diu al à creât al è bon e nol è nuie ch’al merti spreseât, cuant che si lu dopre cun agrât, 5dal moment che al ven santificât de peraule di Diu e de preiere.

6Se tu proponarâs ai fradis chestis robis, tu sarâs propit un bon servidôr di Crist Gjesù, nudrît come che tu sês de fede e de buine dutrine che tu âs imparade cun passion. 7Bute vie però lis sflocjis che no àn nissun dafâ cu la religjon, dute robe di vecjutis.

8Aleniti invezit te religjon, parcè che la gjinastiche dal cuarp e servìs a pôc, biel che la religjon e servìs a dut, vint la promesse de vite di ca jù e di chê a vignî. 9Ce che ti ài dit al merte crodût e acetât in dut. 10Par chel nô o sudìn e o combatìn, parcè che o vin metude la nestre sperance tal Diu vîf, ch’al è il salvadôr di ducj i oms, tacant dai fedêi. 11Chest tu âs di berlâlu a fuart e di insegnâlu.

L’esempli personâl

12Nissun nol à di spreseâti pal fat che tu sês zovin. Anzit presentiti ai tiei fedêi come spieli te peraule, te condote, tal amôr, te fede, te castitât. 13Fin che no vignarai impegniti tal fâ lis leturis, tal racomandâ, tal insegnâ. 14No sta trascurâ il don ch’al è in te e che ti è stât dât midiant de profezie compagnade de imposizion des mans fate dai predis. 15Ten cont di chestis robis, stâur simpri sot, par che ducj a puedin viodi che tu vâs indenant. 16Ten cont ancje di te e dal to insegnament; ten dûr in chestis robis parcè che, fasint cussì, tu ti salvarâs te e chei che ti scoltin.

Compuartament cu lis diferentis categoriis di personis

51No sta cridâi cun malegracie a un vieli, ma dài coragjo come ch’al fos to pari, ai zovins come ch’a fossin tiei fradis, 2a lis vielis come ch’a fossin maris, a lis zovinis come ch’a fossin sûrs, simpri cun grande coretece.

Lis veduis

3Rispiete lis veduis ch’a son veduis pardabon. 4Se però cualchi vedue e à fîs o nevôts, chei li a àn di imparâ prime a vê afiet pe lôr famee e a tornâur ai gjenitôrs il ben che a àn vût di lôr, parcè che chest Diu lu à a grât. 5Invezit chê che e je propit vedue e ch’e je restade dibessole, e dimostre di vê metude in Diu dute la sô sperance e a sta daûr cun perseverance a lis suplichis e a lis orazions, gnot e dì. 6Invezit la vedue che si lasse lâ a lis golis, ancje se e je vive e je biel muarte. 7Ancje chest tu âs di racomandâur: che nissun nol vedi nuie ce dî di lôr. 8Se po un nol viôt dai siei, tacant di chei di cjase, al à rineade la fede e al è piês di un infedêl.

9Une vedue e à di dâsi in note te liste des veduis, a pat che no vedi mancul di sessant’agns, ch’e sedi stade maridade a un om sôl, 10che si vedi fat un bon non cu la testemoneance des buinis oparis: se e à tirât sù ben i fîs, se e à tignude simpri la puarte vierte ai puars, se e à lavâts i pîts ai sants, se e à dade une man ai tribulâts, se e à doprât il so timp in ogni opare di ben. 11No sta acetâ invezit lis veduis plui zovinis parcè che, a pene che lis gafin golis contrariis a Crist, a vuelin tornâsi a maridâ, 12tirantsi un judizi di condane parcè che a àn rineade la prime peraule ch’a vevin dade. 13In plui, stant ancje cence fâ un colp di nuie, a imparin dome a lâ ator pes cjasis; e no dome no fasin un colp di nuie, ma a son ancje peteçonis e curiosis, fevelant ancje di ce che nol larès fevelât. 14Par chel o vuei che lis plui zovinis si maridin, a vedin fruts, a tegnin sù la cjase e no i dedin al contrari nissun rimpin di dî mâl di lôr. 15Di fat plui di une e je za straviade cul lâ daûr di satane.

16Se une femine fedêl e à cun sè cualchi vedue, ch’e proviodi al lôr sostentament cence lâ a pesâ su la Glesie, par dâi la pussibilitât di viodi di chês ch’a son propit veduis.

I predis

17I predis ch’a regin ben a àn di vê dople stime, soredut chei che a scombatin cu la peraule e l’insegnament. 18Di fat e dîs la Scriture: “No sta metii la musarole al bo ch’al bat forment”. E ancje: “Il lavorent al à dirit de sô pae”. 19No sta cjapâ par buinis lis acusis cuintri dai predis, cence l’atestât di doi o trê testemonis. 20Chei che a àn pecjât, coregiju denant di ducj, par che ancje chei altris a vedin teme. 21Ti sconzuri denant di Diu e di Crist Gjesù e denant dai agnui elets, di meti in pratiche chestis robis cence prejudizis e cence tignî par un a damp di chel altri. 22No sta mai vê masse premure di meti lis mans sul cjâf a cualchidun, par no scugnî rispuindi ancje tu dai pecjâts di chei altris. Mantegniti mont.

23No sta lâ indenant bevint simpri aghe rude, ma bêf ancje un got di vin par vie dal to stomi e dai tiei malans, un daûr l’altri.

24I pecjâts di cualchidun a son sot i vôi di ducj e si ju cognòs prime dal judizi; di altris invezit si ju cognòs dome dopo. 25Cussì ancje lis oparis buinis a son sot i vôi di ducj, e chês che no son buinis no puedin restâ platadis.