1 TIMOTEU (2;3)

Letôr: Ester Bidoli

La preiere liturgjiche

21Ti racomandi duncje, prin di dut, che si fasin suplichis, preieris, intercessions e ringraciaments par ducj i oms, 2pai rês e par ducj chei ch’a son in autoritât, par ch’o podìn vivi une vite cuiete e serene, cun dute la religjon e il rispiet. 3Di fat cheste e je une robe biele e che i plâs a Diu nestri salvadôr, 4ch’al vûl che ducj i oms si salvin e a rivin a la cognossince de veretât. 5Di fat Diu al è un sôl e ancje il mediatôr fra Diu e i oms al è un sôl, l’om Crist Gjesù, 6che si è dât vie par riscatâ ducj. Cheste testemoneance lui le à dade tai timps stabilîts, 7e jo o soi stât metût so aralt e apuestul – o stoi disint la veretât e no conti bausiis –, mestri dai paians te fede e te veretât.

Regulis pai oms e pes feminis tes sembleis liturgjichis

8Par chel o vuei che i oms a prèein pardut, alçant viers il cîl mans mondis, cence rabie e spirt di contradizion.

9Te stesse maniere o vuei ch’a fasin ancje lis feminis, vistudis cuntune munture decente: a àn di furnîsi cun rivuart e misure, no di strecis e ornaments di aur o di perlis e viestis di lusso, 10ma di buinis oparis, come che si conven a feminis ch’a disin di jessi plenis di religjon.

11La femine e à di imparâ tasint, stant sotoponude in dut. 12No i permet a la femine di insegnâ e nancje di comandâi al om ma o vuei ch’e stedi cidine. 13Di fat par prin al è stât formât Adam e dome dopo Eve. 14In plui nol è stât Adam a lassâsi imbroiâ ma e je stade la femine che si è lassade imbroiâ e e je colade tal pecjât. 15Cun dut a chel si salvarà parturint i fîs, a pat però di tignî dûr te fede, tal amôr e te santitât, cun sintiment.

I ministris de glesie: il vescul

31Ce che us dîs al merte crodût: se un al smicje a deventâ vescul, al smicje a un lavôr grant. 2Di fat il vescul al scuen jessi une vore a puest, sposât cuntune sole femine, misurât, prudent, dignitôs, ospitâl, bon di insegnâ, 3no cjapât tal vin, no prepotent ma bon di cûr, no barufant, no tacât tai bêçs; 4al à di savê governâ ben la sô famee e tignî i fîs sotoponûts cun dut il rispiet. 5Parcè che se un nol è bon di governâ la sô famee, cemût podaraial proviodi a la Glesie di Diu? 6Nol à di jessi però un a pene batiât, par no che si monti il cjâf e al coli te stesse condane che i è tocjade al diaul. 7In plui al à di vê une buine testemoneance di chei di fûr, par no ch’al pierdi la reputazion e al plombi tai laçs dal diaul.

8Te stesse maniere ancje i diacuns a àn di vê dignitât, no àn di vê dôs peraulis, no àn di cjapâsi masse tal bevi e no àn di vê gole dai bêçs vuadagnâts malamentri; 9in plui a àn di tignî cont il misteri de fede intune cussience nete. 10Ancje lôr a àn di jessi provâts prime e dome dopo, s’a son une vore a puest, a puedin ancje esercitâ il lôr ministeri. 11Te stesse maniere ancje lis feminis a àn di vê dignitât, no àn di jessi peteçonis, ma misuradis e fedelis in dut. 12I diacuns a àn di vê une femine sole, a àn di savê indreçâ ben i lôr fîs e lis lôr cjasis. 13Di fat chei che a varan fat un bon servizi, si cuistaran un grât di onôr e une grande sigurece te fede in Crist Gjesù.

La glesie e il misteri de religjon

14Seben che o speri di vignî li di te il plui in curt pussibil, ti scrîf chestis robis 15par che, s’o ves di intardâmi, tu sepis cemût che tu âs di compuartâti te cjase di Diu, ch’e je la Glesie dal Diu vîf, colone e fonde de veretât. 16Di fat cence ombre di dubit, il misteri de religjon al è grant:

Chel che si è palesât inte cjar,

al è stât justificât tal Spirt,

ur à comparît ai agnui,

al è stât predicjât ai paians,

al è stât crodût intal mont,

al è stât puartât sù in glorie.