2 TESSALONICÊS (1;2)

Letôr: Ivana Della Savia

Seconde letare ai Tessalonicês

Direzion

11Pauli, Silvan e Timoteu a la Glesie di chei di Tessaloniche, in Diu nestri Pari e tal Signôr Gjesù Crist: 2gracie a vualtris e pâs de bande di Diu nestri Pari e dal Signôr Gjesù Crist.

Il judizi di Diu confuart inte persecuzion

3O scugnin ringraciâ Diu in ogni moment par vualtris, fradis, come ch’al è just, parcè che la vuestre fede e cres fûr di misure e l’amôr di un viers di chel altri al è fin parsore; 4che di fat ancje nô si vantìn di vualtris denant des Glesiis di Diu, pe vuestre perseverance e pe vuestre fede in dutis lis vuestris persecuzions e tribulazions ch’o sopuartais. 5Chest al è un segnâl dal judizi just di Diu, che us stimarà degns di chel ream di Diu che o scombatarês ancjemò par lui. 6Di fat al è just che Diu al fasi tribulâ chei che us lambichin 7e che us solevi vualtris, tribulâts insieme cun nô, cuant che il Signôr Gjesù si pandarà dal cîl insieme cui agnui de sô potence, 8tal fûc imborât, par fâ vendete di chei che no vuelin ricognossi Diu e no ubidissin al vanzeli dal Signôr nestri Gjesù. 9Chei li a saran cjastiâts cuntune condane eterne, lontans de muse dal Signôr e dal sflandôr de sô potence, 10cuant che in chê dì al vignarà par jessi glorificât tai siei sants e par jessi contemplât in ducj chei ch’a àn crodût, parcè che la nestre testemoneance fra di vualtris e je stade crodude.

11Par chel nô o preìn simpri par vualtris, par che il nestri Diu us fasi degns de sô clamade e cu la sô potence al colmi dute la vuestre volontât di ben e dute la vore de vuestre fede, 12par che in vualtris al sedi glorificât il non dal Signôr nestri Gjesù e vualtris in lui, par glorie dal nestri Diu e Signôr Gjesù Crist.

La parusie dal Signôr e dal trist

21Cumò us preìn, fradis, sul cont de vignude dal Signôr nestri Gjesù Crist e de nestre riunion cun lui, 2di no lassâsi impressionâ cussì a la svelte tal vuestri spirt e nancje spaventâ par vie di rivelazions profetichis, di discors o di une letare che us varessin mandade nô, come se la zornade dal Signôr e fos propit par rivâ. 3Nissun nol à di imbroiâus e in nissun sisteme! Di fat prime e à di rivâ l’apostasie e al à di palesâsi l’om de inicuitât, il fi de condane, 4chel che si met cuintri e si alce parsore di dut ce ch’al è clamât Diu o al ven preât, fint a sentâsi lui tal templi di Diu, spaçantsi sè par Diu.

5No si visaiso che, cuant che o jeri inmò framieç di vualtris, us ài ditis dutis chestis robis? 6E cumò o savês ce che lu ten frenât, par che si palesi cuant che e sarà la sô ore. 7Di fat il misteri de inicuitât al è za in vore. Dome che si à di spietâ fin cuant che nol è gjavât vie chel che lu ten frenât. 8Propit in chê volte si palesarà il trist e il Signôr Gjesù lu fruçarà cu la soflade de sô bocje e lu fasarà sparî cu la manifestazion de sô vignude. 9La vignude dal trist e ven par opare di satane, cun ogni sorte di potence, e cun meracui e spiei di falsetât, 10cun ducj i imbrois de inicuitât, par chei che si pierdin propit parcè che no àn acetât l’amôr de veretât che ju varès salvâts. 11Ve il parcè che Diu ur mande une fuarce di falsetât par ch’a crodin a la bausie, 12par ch’a sedin condanâts ducj chei che no àn crodût a la veretât ma si son butâts de bande de inicuitât.

Tignî dûr

13Nô però o vin di ringraciâ Diu di un continui par vualtris, fradis benvolûts dal Signôr, parcè che Diu us à sielzûts ancjemò dal principi par salvâus te santificazion dal Spirt e te fede de veretât. 14Propit a chest us à clamâts midiant dal nestri vanzeli, par rivâ a cjapâ la glorie dal Signôr nestri Gjesù Crist.

15Alore, fradis, stait salts e tignît cont des tradizions che o sês stâts istruîts, tant midiant de nestre vôs vive che de nestre letare. 16E Gjesù Crist nestri Signôr in persone e Diu nestri Pari che nus à volût ben e nus à dade une consolazion eterne e une buine sperance, pal so boncûr 17al confuarti e al confermi i vuestris cûrs in ogni opare e peraule buine.