1 TESSALONICÊS (5)

Letôr: Caterina Presacco

Il timp de parusie

51Par chel ch’al rivuarde il timp e l’ore, fradis, nol covente che us scrivìn. 2Di fat o savês benon dibessôi che la zornade dal Signôr e rive come un lari di gnot. 3Cuant che us disaran: “Pâs e sigurece”, in chê volte a colp e plombarà sore di vualtris la ruvine, come lis dois dal part a une femine ch’e sta par parturî, e no ’nt scjamparà un.

Spietant l’ore

4Ma vualtris, fradis, no sês intal scûr, di mût che chê zornade us capiti a tradiment come un lari; 5di fat vualtris o sês ducj fîs de lûs e fîs dal dì; nô no sin ni de gnot ni dal scûr. 6Par chel no durmìn come chei altris, ma o veglìn e o savìn misurâsi.

7Chei ch’a duarmin, a duarmin di gnot, e chei che s’incjochin, s’incjochin di gnot. 8Nô invezit, ch’o sin chei dal dì, o vin di jessi sancîrs, riviestûts cu la corace de fede e dal amôr, vint par elmet la sperance de salvece. 9Di fat Diu no nus à distinâts al svindic ma a cuistâsi la salvece midiant dal Signôr nestri Gjesù Crist, 10che al è muart par nô par che, tant ch’o veglìn tant ch’o durmìn, o vivìn cun lui. 11Par chel confuartaitsi fra di vualtris, dantsi il bon esempli un cul altri, come che za o fasês.

Esigjencis comunitariis

12Us preìn, fradis, di preseâ chei ch’a lavorin framieç di vualtris e a son metûts parsore di vualtris tal Signôr e us indrecin; 13vêt par lôr grant rispiet e afiet, pal lavôr ch’a fasin. Vivêt in pâs fra di vualtris. 14Us racomandìn, fradis, di coregi i ribei, di dâur spirt ai spaurôs, di tignî sù i flaps, di vê pazience cun ducj. 15Viodêt che nissun nol torni a un altri mâl par mâl; cirît invezit di fâsi simpri dal ben un cul altri e cun ducj. 16Stait simpri legris. 17Preait cence soste. 18Ringraciait di dut. Di fat e je cheste la volontât di Diu in Gjesù Crist sul vuestri cont. 19No stait a distudâ il Spirt. 20No stait a dispreseâ lis profeziis. 21Esaminait dut e tignît ce ch’al è bon. 22Stait lontans di ogni sorte di mâl.

Conclusion

23Il Diu de pâs us rinfuartissi fint insomp e dut ce ch’al è vuestri, spirt, anime e cuarp, ch’a sedin tignûts cont cence maglis par cuant che al tornarà il Signôr nestri Gjesù Crist. 24Chel che us clame al è di peraule e al puartarà dut al colm.

25Fradis, preait ancje par nô.

26Saludait ducj i fradis cuntune sante bussade. 27Us sconzuri tal Signôr di fâ lei cheste letare a ducj i fradis.

28La gracie dal Signôr nestri Gjesù Crist ch’e sedi cun vualtris.