1 TESSALONICÊS (3;4)

Letôr: Giampaolo Bulligan

La mission di Timoteu

31Par chel, no podint plui tignî dûr, o vin preferît di restâ a Atene dibessôi 2e di mandâ Timoteu, nestri fradi e colaboradôr di Diu tal vanzeli di Crist, par dâus spirt e tignîus sù te vuestre fede, 3par che nissun nol pierdi il cjâf in chestis tribulazions. Di fat lu savês ancje vualtris che al è chest il nestri distin. 4Di fat cuant che o jerin framieç di vualtris us visavin che o varessin vût di tribulâ, come che al è sucedût e lu savês ancje vualtris. 5Par chel, no podint plui tignî dûr, o ài mandât a cjapâ sù notizis de vuestre fede, tal scrupul che il tentadôr us ves tentâts e che la nestre fadie e fos lade dute in strucj.

6Propit cumò Timoteu di li di vualtris al è tornât chi di nô. Lui nus à puartadis buinis gnovis sul cont de vuestre fede, sul vuestri amôr, sul bon ricuart ch’o vês simpri di nô, seneôs di viodinus come ch’o vin gole ancje nô di tornâus a viodi vualtris. 7Cussì, fradis, in ogni nestre conseguence e tribulazion o vin cjapât confuart in vualtris, par vie de vuestre fede. 8Cumò sì che o tornìn a vivi, parcè che vualtris o stais salts tal Signôr. 9Cemût podarino duncje ringraciâ Diu par vualtris, par dute la contentece ch’o sintìn par merit vuestri denant dal nestri Diu? 10Gnot e dì, cun dut il cûr, o preìn di tornâ a viodi la vuestre muse e di colmâ ce ch’al mancje a la vuestre fede.

11Diu, Pari nestri, e il Signôr nestri Gjesù che nus splanin la strade viers di vualtris. 12Il Signôr us fasi cressi e us incolmi di amôr fra di vualtris e cun ducj, come che ancje nô lu sintìn par vualtris, 13par che i vuestris cûrs a sedin cence magle e salts te santitât denant dal nestri Diu e Pari cuant che il Signôr nestri Gjesù al tornarà cun ducj i siei sants.

41Pal rest, fradis, us preìn e us suplichìn tal Signôr Gjesù Crist che, come ch’o vês imparât di nô il mût di lâ indenant e di plasêi a Diu, come che par altri za o lais indenant, cussì o ledis simpri plui indenant. 2O savês ce ordins che us vin dâts tal Signôr Gjesù.

Santitât e purece cristiane

3Di fat cheste e je la volontât di Diu: che o deventais sants, che si tignîs lontans des sporcjetâts. 4Ognidun di vualtris ch’al cjoli cun sè une femine te santitât e tal onôr, 5cence lassâsi lâ a lis passions come ch’a fasin i paians che no cognossin Diu. 6Sun cheste cuistion nissun nol à di straviâ o di imbroiâ so fradi, parcè che il Signôr si svindiche di chestis robis, come che ancje nô us vin dit e testemoneât. 7Di fat Diu no us à clamâts a la sporcjetât ma a la santitât. 8Pa la cuâl chel che nol rispiete chescj principis nol spresee un om ma Diu, che us dà il so Sant Spirt.

Amôr di fradis e voe di fâ

9Rivuart po al volêsi ben come fradis, nol covente che us scrivìn, parcè che propit vualtris o vês imparât di Diu a volêsi ben un cul altri. 10Che anzit lu fasês cun ducj i fradis de Macedonie. Us racomandìn, fradis, di lâ ancjemò plui indenant, 11di metile dute tal cirî la pâs, di stâ daûr a lis vuestris robis, di lavorâ cu lis vuestris mans, come che us vin racomandât, 12par podêsi compuartâ cun onôr denant di chei di fûr e no vê dibisugne di nissun.

Il distin dai muarts

13No volìn lassâus ta l’ignorance, fradis, rivuart a chei ch’a duarmin, par che no vedis di avilîsi come chei altris che no àn sperance. 14Di fat se o crodìn che Gjesù al è muart e al è resussitât, cussì o vin ancje di crodi che Diu al tirarà dongje di sè chei che si son indurmidîts midiant di Gjesù. 15Chest us al disìn su la peraule dal Signôr: che nô, ch’o sin in vite e o sarìn restâts ancjemò culì, cuant che al tornarà il Signôr no rivarìn prime di chei che si son indurmidîts. 16Parcè che il Signôr in persone, al comant, a la vôs dal arcagnul, al sun de trombe di Diu al vignarà jù dal cîl e i muarts in Crist a resussitaran par prins. 17E daûr ancje nô, ch’o sin in vite, ch’o sarìn restâts ancjemò culì, o sarìn puartâts sù cun lôr parsore dai nûi par lâ incuintri al Signôr. E cussì o sarìn simpri cul Signôr. 18Confuartaitsi alore un cul altri cun chestis peraulis.