GALAZIANS (3)

Letôr: Nicola Saccomano

La justificazion e ven de fede, no des oparis de leç

31Stupidats di galazians! Cui àial mai podût striâus, propit vualtris che us è stât presentât denant dai vôi Gjesù Crist metût in crôs? 2O varès gust di savê dome chest di vualtris: vêso vût il Spirt midiant des oparis de leç o scoltant la peraule de fede? 3Sêso propit tant cence sintiment, tant pôc inteligjents? Dopo di vê scomençât cul Spirt, laiso cumò a finîle cu la cjar? 4Vêso provadis tantis robis e tant grandis propit par dibant? Fossial almancul par dibant! 5Duncje chel che us dà il Spirt cence culumie e al opere meracui framieç di vualtris, fasial dut chest par vie des oparis de leç o par vie ch’o vês scoltade la peraule de fede?

6Al è cussì che Abram i à crodût a Diu e chest i è stât metût in cont di justizie. 7Tignît a ments alore che a son fîs di Abram chei ch’a vegnin de fede. 8E la Scriture, proviodint che Diu al varès justificâts i paians midiant de fede, i veve za contade a Abram cheste buine gnove: Midiant di te a saran benedîts ducj i popui. 9Di mût che chei che si fondin su la fede a son benedîts cun Abram ch’al à crodût. 10Di fat ducj chei che si fondin su lis oparis de leç, a son sogjets a une maludizion, parcè che al è scrit: Maladet chel che nol sta a dutis lis peraulis di cheste leç e no lis met in vore. 11Che nissun di chei ch’a restin te leç al sedi justificât, al è clâr, parcè che il just al vivarà midiant de fede. 12La leç però no ven fûr de fede, ma chel ch’al fasarà chestis robis al vivarà midiant di lôr. 13Crist nus à sfrancjâts liberantnus de maludizion de leç e deventant lui maludizion pal nestri ben, come ch’al è scrit: Maladet chel ch’al è picjât suntun len, 14par che in Crist Gjesù la benedizion di Abram ur rivàs ai paians, di mût ch’a podessin cjapâ par fede il Spirt che ur jere stât imprometût.

La benedizion a Abram

15Fradis, o feveli propit a om vie. Nissun nol scancele o nol fâs zontis a un testament ch’al è stât fat bon, ancje s’al è di un om. 16Poben lis promessis a son stadis fatis a Abram e a la sô dissendence. Nol dîs: “e a lis sôs dissendencis”, come se si tratàs di un grum di lôr, ma a la tô dissendence, come se si tratàs di un sôl, tant a dî di Crist. 17O vuei dîus chest: la leç, rivade cuatricent e trente agns dopo, no pò scancelâ un testament che Diu lu veve za fat bon prime, scancelant cussì la promesse. 18Parcè che se la ereditât e je leade a la leç, no je plui leade a une promesse; ma Diu al à regalade la sô gracie a Abram midiant di une promesse.

La funzion provisorie de leç

19Alore par ce ise la leç? E je stade zontade par colpe des ribelions, fin che no fos rivade la dissendence che e veve vude la promesse, mandade fûr midiant dai agnui, a mieç di un mediatôr. 20Ma se si trate di une persone sole nol esist mediatôr; e Diu al è un sôl. 21La leç vadie alore cuintri des promessis di Diu? Mai vie po! Se in efiets e fos stade dade une leç in grât di dâ la vite, la justificazion si le varès vude propit te leç. 22Ma la Scriture e à inclostradis dutis lis robis cul pecjât, di mût che la promesse che e ven de fede in Gjesù Crist ur rivàs a di chei ch’a crodin come regâl.

23Prime ch’e rivàs la fede, o jerin vuardeâts come presonîrs sot de paronance de leç, in spiete di chê fede che si sarès pandude. 24E cussì la leç e je deventade par nô come un mestri fintremai a Crist, par ch’o fossin justificâts par vie de fede. 25Une volte rivade la fede, no sin stâts plui sot de paronance dal mestri. 26Di fat o sês ducj fîs di Diu in Crist Gjesù midiant de fede; 27parcè che ducj vualtris ch’o sês stâts batiâts in Crist, si sês riviestûts di Crist. 28Nol esist plui ni gjudeu ni grêc, nol esist plui ni sotan ni libar, nol esist plui ni om ni femine: ducj vualtris o sês une persone sole in Crist Gjesù. 29Se duncje o sês di Crist, alore o sês dissendence di Abram, erêts seont la promesse.