2 CORINTS (10)

Letôr: Natalia Lazzarini

Apologjie personâl cuintri de acuse di debolece e di ambizion

101O soi jo, Pauli, che us racomandi pe dolcece e pe benignitât di Crist, jo che denant di vualtris o sarès cussì umil ma di lontan prepotent pal vuestri ben. 2Us prei che no mi sucedi di scugnî doprâ in vuestre presince chê fuarce che o pensi di scugnî doprâ cuintri cualchidun di chei che nus judichin come se si compuartassin seont la cjar. 3Di fat, s’o vivìn seont la cjar, no combatìn seont la cjar. 4Lis armis de nestre batae no son seont la cjar, ma a àn di Diu la virtût di splanâ fuartecis, 5sfantant i resonaments e ogni altece supierbeose che si alce cuintri la cognossince di Diu, e ridusint ogni inteligjence a la ubidience a Crist. 6O sin pronts a cjastiâ ogni sorte di disubidience, a pene che la vuestre ubidience e sarà perfete.

7Cjalait lis robis in muse: se un al è convint di jessi di Crist, ch’al tegni a ments che se lui al è di Crist lu sin ancje nô; 8che se ancje mi vantàs di plui dal nestri podê, che il Signôr nus à dât par tirâus sù e no par butâus jù, no varès propit nuie ce vergognâmi. 9Chest lu dîs par no semeâ di volêus spaventâ cu lis letaris! 10Parcè che “lis letaris – a van disint – a son duris e fuartis, ma la sô presince fisiche e je sclagne e la peraule masse ordenarie”. 11Ch’al tegni aments chel li che ce che nô o sin cu lis peraulis par letare, di lontan, o sarìn ancje cui fats, di persone.

12Sigûr che nô no vin il fiât di metisi a confront o a pâr di nissun di chei che si racomandin dibessôi; ma biel che si misurin dibessôi e si paragonin cun sè stes, a van vie di cjâf. 13Nô invezit no si vantìn fûr di misure, ma seont la regule de misure che Diu nus à distinât e che nus à fats rivâ fint a vualtris. 14E nancje no si alcìn plui di ce ch’al è just, come se no fossin rivâts fin li di vualtris, biel che fin li di vualtris o sin rivâts cul vanzeli di Crist. 15E nancje no si vantìn cence dirit des fadiis di chei altris, ma o vin la sperance, cul cressi de vuestre fede, di cressi simpri di plui fra di vualtris seont la nestre misure 16e di podê predicjâur il vanzeli a di chei che a vivin plui in là di vualtris, cence vantâsi, come ch’a fasin altris di lôr, di robis za fatis di altris.

17Pa la cuâl chel che si vante, che si vanti tal Signôr; parcè che nol ven fat bon chel che si laude dibessôl ma chel che il Signôr lu racomande.