2 CORINTS (9)

Letôr: Marta Vezzi

91Par chel ch’al rivuarde po chest servizi pal ben dai sants, nol covente che us scrivi a vualtris. 2O cognòs benon il vuestri bonvolê e mi vanti di vualtris cun chei de Macedonie disint che l’Acaie e je pronte za dal an passât e che une vore di lôr a son stâts invoâts de vuestre passion. 3E o ài mandât i fradis par che la nestre braure par vualtris sun chest pont no vedi di palesâsi cence fonde ma o sedis pronts pardabon, come che jo o levi disint. 4Che nol sucedi che, rivant cun me cualchidun de Macedonie, no us cjati preparâts e cussì nô, par no fevelâ di vualtris, o vedin di restâ malapaiâts di cheste fiducie. 5Par chel o vin ritignût just di scugnî invidâ i fradis a vignî di vualtris prin di nô, par organizâ la vuestre ufierte za imprometude, di mût ch’e sedi pronte come une vere ufierte e no come bêçs gjavâts par fuarce.

Vantaçs spirtuâi de colete

6Tignît aments che chel ch’al semene scjars, al cjaparà sù ancje scjars; e chel ch’al semene a plene man, a plene man al cjaparà sù. 7Ognidun ch’al dedi seont ce ch’al à distinât tal so cûr, no cun avilizion o par fuarce, parcè che Diu i vûl ben a di chel ch’al dà content. 8E Diu al è bon di spandi sore di vualtris ogni sorte di graciis, di mût che, vint simpri e dapardut ce che us covente, o podês fâ cun gjenerositât lis oparis di ben, 9come ch’al è scrit:

Ur à dât ai puars cence misure,

la sô justizie e durarà par simpri.

10E chel che i furnìs la semence al semenadôr e il pan pal sostentament, al furnissarà e al moltiplicarà in vualtris la semence e al fasarà cressi i prodots de vuestre justizie. 11Alore o sarês siôrs par ogni at di gjenerositât, e chest al fasarà lâ sù fint a Diu la cjante dal ringraciament, par merit vuestri. 12Parcè che il servizi di cheste opare sante no dome al ven incuintri a lis dibisugnis dai sants ma al butarà une vore di ringraciaments a Diu. 13Pe biele prove di chest servizi a ringraciaran Diu pe vuestre ubidience e acetazion dal vanzeli di Crist, e pe gjenerositât de vuestre comunion cun lôr e cun ducj. 14Preant par vualtris, us volaran ancje ben, par vie de straordenarie gracie di Diu che si è spandude sore di vualtris. 15Ch’al sedi ringraciât Diu par chest so regâl che no si rive nancje a contâlu.