1 CORINTS (8;9)

Letôr: Giuseppe Mattiussi

Lis cjars sacrificadis ai idui

81Sul cont des cjars sacrificadis ai idui, nô o savìn, parcè che ducj o vin di vê la sience. Ma la sience e sglonfe, invezit l’amôr al fâs sù. 2Se un al crôt di savê alc, nol à ancjemò imparât il mût che si à di savê. 3Invezit chel che i vûl ben a Diu, al è cognossût di lui. 4Sul cont po dal mangjâ lis cjars sacrificadis ai idui, nô o savìn che un idul nol è nuie tal mont e ch’and è un Diu sôl. 5Di fat se ancje cualchidun che al fos fat passâ par divinitât tal cîl e su la tiere, come che in efiets and è une vore di dius e une vore di signôrs, 6par nô and è un Diu sôl, il Pari, e dut al diven di lui e nô o sin par lui; e un Signôr sôl, Gjesù Crist, che midiant di lui al è dut e ancje nô o sin midiant di lui.

7No ducj però a àn la sience; anzit cualchidun, pal fat di vê praticât i idui fin cumò, al mangje lis cjars come cjars sacrificadis ai idui, e la sô cussience, debule come ch’e je, si magle. 8No sarà di sigûr une mangjative a svicinânus a Diu; e nancje, stant cence, o vignìn a pierdi alc, come che mangjant no ’nt vuadagnìn nuie. 9Stait atents però che cheste vuestre libertât no fasi inçopedâ i plui debui. 10Di fat se un ti viodès te, che tu âs sience, a gustâ tun templi di idui, la cussience di chest om debul no saressie invoade a mangjâ lis cjars sacrificadis ai idui? 11E ve che, par colpe de tô sience, si ruvine il debul, il fradi che Crist al è muart par lui. 12E pecjant cussì cuintri dai vuestris fradis e ferint la lôr cussience debule, o pecjais cuintri di Crist. 13Par chel, se une mangjative e scandulize gno fradi, no mangjarai cjar mai plui e mai altri, par no scandulizâ gno fradi.

L’esempli di Pauli

91No soio libar jo? No soio apuestul? No àio viodût Gjesù nestri Signôr? No sêso vualtris la mê vore tal Signôr? 2Se no soi apuestul par altris di lôr, almancul par vualtris lu soi; vualtris o sês il sigjîl dal gno apostolât tal Signôr. 3E je cheste la mê difese cuintri di chei che mi incolpin. 4No vino dirit di mangjâ e di bevi? 5No vino dirit di menâsi daûr une femine cristiane, come ch’a fasin chei altris apuestui e i fradis dal Signôr, e Chefa? 6O sino dome jo e Barnabe che no vin dirit di no lavorâ?

7Ma cui fasial il soldât paiant di sachete? Cui plantial un vignâl cence mangjânt il prodot? Cui passonial un trop cence cerçâ il lat? 8Disio chest di un pont di viste uman o no disie cussì ancje la Leç? 9Di fat te leç di Mosè al è scrit: No sta metii la musolarie al bo ch’al trebie. Di cuant in ca Diu s’interessial dai bûs? 10No fevelial forsit par nô? Sigûr ch’al è scrit par nô! Parcè che al è naturâl par chel ch’al are arâ inte sperance, come par chel ch’al trebie trebiâ inte sperance di vê la sô part. 11Se nô o vin semenadis in vualtris lis robis spirtuâls, isal propit masse s’o seselìn bens matereâi? 12Se chei altris a àn dirit sore di vualtris, nô no ’nt varessino di vê plui di lôr? Ma no vin volût valêsi di chest dirit, che anzit o sopuartìn di dut par no meti berdeis al vanzeli di Crist. 13No savêso che chei ch’a fasin lis funzions tal templi a mangjin di ce ch’al è tal templi, e chei ch’a servissin ator dal altâr a cjapin part dal altâr? 14Cussì ancje il Signôr al à disponût che chei ch’a predicjin il vanzeli a vivin dal vanzeli.

15Ma jo no mi ài fat valê nissun di chescj dirits e nancje no us scrîf par che si fasi cussì sul gno cont. O varès nant murî. Nissun no mi gjavarà cheste braure! 16Di fat par me predicjâ il vanzeli no je une braure; o sint une dibisugne, e puar mai me se no predicjàs il vanzeli! 17Se lu fasès di mê volontât, o varès la pae; ma no fasintlu di mê volontât, al vûl dî che mi è stade dade une consegne. 18Cuâl saraial alore il gno merit? Chel di predicjâ il vanzeli cence fâ valê il dirit che il vanzeli mi dà.

19Di fat, seben ch’o soi libar denant di ducj, mi soi fat servidôr di ducj par vuadagnâ plui int ch’o podevi: 20mi soi fat gjudeu cui gjudeus par vuadagnâ i gjudeus; cun chei ch’a son sot de leç o soi deventât come un ch’al è sot de leç, cun dut che no jeri sot de leç, par vuadagnâ chei ch’a son sot de leç. 21Cun chei che no àn leç, o soi deventât come un ch’al è cence leç, cun dut che no jeri cence la leç di Diu, anzit cun dut ch’o jeri cjapât dentri te leç di Crist, par vuadagnâ chei ch’a son cence leç. 22Mi soi fat debul cui debui, par vuadagnâ i debui; mi soi fat dut a ducj, par salvâ in ducj i mûts cualchidun. 23E o fâs dut pal vanzeli, par vê part ancje jo cun lôr.

24No savêso che tes corsis dal stadi a corin ducj ma il premi lu cjape dome un? O vês di cori in mût di rivâ a cjapâlu! 25Ogni campion si ten lontan di dut; lôr lu fasin par vê une zoe che si flapìs, nô invezit par une che no si flapìs. 26Cussì jo o côr, ma no come chel che nol sa là ch’al va; o fâs pugjilât ma no come chel ch’al dà là ch’al capite, 27anzit o fronti il gno cuarp e lu ridûs in sclavitût, par no che mi sucedi che, dopo di vê predicjât a di chei altris, o sedi scualificât propit jo.