ROMANS (16)

Letôr: Mario Narduzzi

Salûts e ultimis racomandazions

161Us racomandi Febe, nestre sûr, che cumò e je diaconesse te Glesie di Cencre: 2viodêt di fâi un bon acet tal non dal Signôr, come che si conven ai sants, e di dâi une man in ogni cuistion là che e vedi dibisugne di vualtris, parcè che jê e à viodût di tancj di lôr in tancj câs; ancje di me.

3Saludait Priscje e Acuile, ch’a àn lavorât cun me in Crist Gjesù: par salvâ la mê vite, lôr a àn ufiert il lôr cjâf a la spade. 4No ju ringrazii dome jo, ma dutis lis Glesiis dai paians. 5Saludait ancje la comunitât che si dà dongje in cjase lôr.

Saludait Epenêt, che i vuei un ben di vite e ch’al rapresente lis primiziis da l’Asie ufiertis a Crist. 6Saludait Marie, ch’e à scombatût tant par vualtris. 7Saludait Andronic e Gjunie, de mê stesse gjernazie, ch’a son stâts in preson cun me; si son fats un non fra i apuestui e si son dâts a Crist prime di me. 8Saludait Ampliât, che i vuei propit ben intal Signôr. 9Saludait Urban, nestri colaboradôr in Crist, e il gno cjâr Stachi. 10Saludait Apele, ch’al à dade buine prove in Crist. Saludait ducj chei de cjase di Aristobul. 11Saludait Erodion, de mê stesse gjernazie; saludait ducj chei de cjase di Narcîs, ch’a son unîts a nô intal Signôr. 12Saludait Trifene e Trifose, ch’a lavorin pal Signôr. Saludait la mê Perside tant cjare, che e à fadiât un grum pal Signôr. 13Rufo, l’elet dal Signôr, e sô mari, che e je ancje la mê. 14Saludait Asincrit, Flegont, Erme, Patrobe, Erma e i fradis ch’a son cun lôr. 15Saludait Filolic e Gjulie, Nereu e sô sûr, Olimpie e ducj i sants ch’a son cun lôr. 16Saludaitsi un cul altri cu la sante bussade. Us saludin dutis lis comunitâts de Glesie unidis in Crist.

17Us racomadi, fradis, di sta vuardâts di chei ch’a inviin divisions e stralencs cuintri de dutrine ch’o vês imparade: stait lontans di lôr! 18Di fat int come lôr no servissin Crist nestri Signôr ma il lôr tornecont personâl, e cun peraulis slissotis e cun promessis di benedizions a imbroin il cûr de int a la buine.

19La vuestre ubidience e je cognossude pardut. Cussì o gjolt par merit vuestri, ma o vuei che o sedis savis tal ben e libars dal mâl. 20Il Diu de pâs al sfracaiarà satane sot i vuestris pîts, in curt! La gracie dal Signôr nestri Gjesù Crist ch’e sedi cun vualtris.

21Us salude Timoteu gno colaboradôr; Lucio, Gjason e Sosipatri, de mê stesse gjernazie. 22Us saludi tal Signôr ancje jo, Tierç, ch’o ài scrite la letare. 23Us salude Caio, che mi à lozât, e dute la comunitât. Us salude Erast, ch’al à la casse de citât, e il fradi Cuart.

Dossologje finâl

25A di chel ch’al à il podê di sigurâus

seont il vanzeli ch’o predicji e il mes di Gjesù Crist,

- seont la rivelazion dal plan mistereôs tasût dai secui eternis,

26ma pandût e fat cognossi cumò midiant des scrituris dai profetis,

par ordin di Diu eterni, a ducj i popui

par ch’a ubidissin a la fede, -

27a Diu unic sapient,

midiant di Gjesù Crist,

la glorie tai secui dai secui. Amen.