LEVITIC (19)

Letôr: Aldina Vidussi

Regulis cultuâls e morâls

191Il Signôr i fevelà a Mosè e i disè: 2“Dîsii a dute la comunitât dai fîs di Israel: Viodêt di jessi sants, parcè che jo, il Signôr, il vuestri Diu, o soi sant.

3Ognidun al à di onorâ sô mari e so pari e di rispietâ lis mês sabidis. Jo o soi il Signôr, il vuestri Diu.

4No stait a butâsi cui dius e no stait a fâsi dius di metal fondût. Jo o soi il Signôr, il vuestri Diu.

5Cuant che i ufrissarês al Signôr une vitime come sacrifici di comunion, o vês di ufrîje in mût che le vedi a grât. 6O vês di mangjâle te stesse dì che le vês sacrificade e tal indoman; ce che al vanzarà fint a la tierce dì lu brusarês tal fûc. 7Se invezit o vessis di mangjânt la tierce dì, e sarès une robate; il sacrifici nol sarès a grât. 8Chel che int mangjarès, al varès di paiâ pe sô tristerie, parcè che al profanarès ce che al è sant pal Signôr; chel om li al sarès cjonçât vie dal so popul.

9Cuant che o tajarês il forment de vuestre tiere, no vês di taiâlu fint ad ôr dal cjamp ni di cjapâ sù i spîs che a restin dopo seselât; 10cussì tal to vignâl no sta vendemâ ducj i grignei ni cjapâ sù i àsins colâts; tu jai lassarâs al puar e al forest. Jo o soi il Signôr, il vuestri Diu.

11No stait a robâ ni a doprâ ingjan o falsetât un a damp di chei altris.

12No stait a zurâ il fals, doprant il gno non, parcè che tu profanaressis il non dal to Diu. Jo o soi il Signôr.

13No sta tibiâ il to prossim e no sta puartâi vie il so; il salari di chel che al è a zornade sot di te nol à di restâ li di te fintremai tal indoman.

14No sta sbeleâ il sort e no sta meti stralencs denant dal vuarp, ma viôt di vê teme dal to Diu. Jo o soi il Signôr.

15No sta fâ injustiziis in judissi; no sta fâ diferencis cul biât e no sta lassâti inceâ dal grant, ma viôt di judicâ il to prossim cun justissie. 16No sta lâ ator semenant cjàcaris framieç de int e no sta presentâti dal judiç a domandâ il cjâf dal to prossim. Jo o soi il Signôr.

17No sta vê asse tal to cûr cuintri di to fradi; fâsii al to prossim une corezion su la muse, cussì no tu ti cjamarâs di un pecjât par vie di lui. 18No sta cirî svindics e no sta tignî rusins cuintri dai fîs dal to popul, ma tu amarâs il to prossim come te in persone. Jo o soi il Signôr.

19Metêt in pratiche lis mês leçs. No sta incubiâ doi nemâi diferents; no sta semenâ tal to cjamp dôs semencis diferentis e no sta puartâ vistîts di doi tiessûts diferents.

20Se un al va cuntune femine ch’e sedi sclave e imprometude a di un altri om ma no vendude o sfrancjade, a saran cjastiâts ducj i doi; no però copâts, parcè che jê no je libare.

21L’om al menarà denant dal Signôr, te jentrade de tende de cunvigne, in sacrifici di riparazion, un roc; 22cun chest roc il predi al fasarà par lui la funzion di espiazion denant dal Signôr pal pecjât che al à fat e il pecjât i sarà perdonât.

23Cuant che o sarês jentrâts te tiere e o varês plantât ogni sorte di pomârs, o considerarês lis lôr pomis tant che la piel de lôr nature; par trê agns a saran par vualtris cence circuncision; no varês di mangjânt. 24Il cuart an dutis lis pomis a saran benedidis pal Signôr, tant che un regâl di fieste. 25Il cuint an o mangjarês lis pomis di chei arbui; cussì a butaran ancjemò par vualtris. Jo o soi il Signôr, il vuestri Diu.

26No stait a mangjâ cjar cul sanc.

No stait a butâsi ni tai strolegaçs ni tai incjantesims.

27No stait a rocâsi il cjâf a taront e no stait a staronzâ l’ôr de barbe. 28No stait a fâsi tais sul cuarp par un muart ni a tatuâsi. Jo o soi il Signôr.

29No sta profanâ tô fie lassantle doprâ, par no che la tiere si prostituissi e si jempli di porcariis.

30O rispietarês lis mês sabidis e o varês rivuart pal gno santuari. Jo o soi il Signôr.

31No stait a lâ di chei che a clamin i muarts ni dai induvinins; no stait a interpelâju par no insoçâsi par colpe lôr. Jo o soi il Signôr, il vuestri Diu.

32Jeve in pîts presince di chel che al à i cjavei blancs; onore la persone dal vieli e vîf tal timôr dal to Diu. Jo o soi il Signôr.

33Cuant che un forest si stabilissarà framieç di vualtris, te vuestre tiere, no stait a fâi malegraciis. 34Il forest che al vîf framieç di vualtris o vês di tratâlu compagn di chel nassût framieç di vualtris; tu lu amarâs come te in persone, parcè che ancje vualtris o vês stât forescj te tiere dal Egjit. 35No stait a fâ injustiziis tal judicâ, tal misurâ trop che une robe e je lungje, trop ch’e pese e trop che and è dentri. 36Viodêt di vê une staderie juste, pês juscj, un efa just, un hin just. Jo o soi il Signôr, vuestri Diu, che us ài fats saltâ fûr de tiere dal Egjit.

37Stait atents a dutis lis mês leçs e a ducj i miei ordins e metêtju in vore. Jo o soi il Signôr”.