ROMANS (7)

Letôr: Monica Aguzzi

L’om al è liberât de sotanance de leç

71O no savêso, fradis – o feveli a int esperte di leç – che la leç e à fuarce sul om par dut il timp ch’al vîf? 2Di fat la femine maridade, in fuarce de leç, e je leade al om fin che lui al è in vite; ma se l’om al mûr, jê e je liberade dal dut de leç che le ten leade al so om. 3Pa la cuâl se jê, intant che il so om al è in vite, e va cuntun altri om, e je considerade adultare. Se invezit il so om al mûr, jê e je libare tai confronts de leç, di mut che no je plui adultare se e va cuntun altri om. 4Cussì, fradis miei, ancje vualtris o sês stâts fats murî a la leç in fuarce dal cuarp di Crist par jessi dâts a di un altri, a di chel che al è resurît de muart par che o podìn butâ alc di bon par Diu. 5Di fat cuant che o jerin sot dal podê de cjar, lis passions disordenadis peadis al pecjât, passions ch’a vignivin stiçadis midiant de leç, si discjadenavin tal nestri cuarp produsint dome robis distinadis a la muart. 6Cumò invezit o sin stâts sfrancjâts de leç, che nus tignive sotans, par podê servî Diu tal gnûf ordin dal Spirt e no in chel vieri de letare.

La leç no je par sè cause di pecjât

7Alore ce vino di dî? Che la leç e je pecjât? Ma vie po! Epûr jo o ài cognossût il pecjât dome midiant de leç. Di fat no varès cognossude la brame des passions se la leç no ves dit: No sta desiderâ. 8Ma il pecjât, cjatât un rimpin intal comandament, al à impiât dentri di me ogni sorte di bramis; di fat il pecjât cence la leç al è muart. 9Jo une volte cence la leç o vivevi; vignût però il comandament de leç, il pecjât al à cjapade vigorie 10e jo o soi muart. E il comandament, ch’al veve di fâmi vivi, al è deventât par me cause di muart. 11Di fat il pecjât, cjatât un rimpin, midiant dal comandament, mi à imbroiât e mi à copât midiant di lui. 12Partant la leç e je sante, il comandament al è sant, just e bon.

La leç no je par sè cause di muart

13Ma alore ce ch’al è bon si è tramudât in muart par me? Ma vie po! Ma il pecjât, midiant di ce ch’al è bon, mi fâs murî, par che si palesi pecjât e midiant dal comandament si palesi inmò di plui cause di pecjât.

14Di fat o savìn che la leç e je spirtuâl e invezit jo o soi di cjar, vendût sotan al pecjât. 15In efiets no rivi a capî nancje jo ce ch’o fâs: di fat no fâs ce ch’o vuei ma o fâs ce che no volarès. 16E s’o fâs ce che no volarès, o ricognòs che la leç e je buine. 17Dome che no soi plui jo a fâlu, ma il pecjât ch’al vîf dentri di me. 18Di fat o sai che in me, ven a stâi inte mê cjar, nol è a stâ il ben; parcè che o ài a puartade di man la voe dal ben ma no la virtût di fâlu. 19Di fat no fâs il ben che o volarès, ma o fâs ce che no volarès e al è mâl. 20Se alore o fâs ce che no vuei, no soi plui jo che lu fâs, ma il pecjât ch’al vîf dentri di me. 21O cjati in efiets cheste leç: propit cuant che o volarès fâ il ben, il mâl al è a puartade di man. 22Di fat, dentri di me, o soi d’acuardi cu la leç di Diu, 23ma tal gno cuarp o viôt un’altre leç, che i fâs vuere a la leç dal gno sintiment e mi rint sclâf de leç dal pecjât ch’e je tal gno cuarp. 24Joi, puar mai me! Cui mi liberaraial di chest cuarp distinât a la muart?

La soluzion finâl

25Ch’al sedi ringraciât Diu midiant di Gjesù Crist nestri Signôr! Sicheduncje jo, simpri chê persone stesse, di une bande o servìs cul sintiment la leç di Diu e di chê altre, cu la cjar, o servìs a la leç dal pecjât.