ROMANS (2)

Letôr: Sergio Turco

Il pecjât tal mont gjudaic

21Pa la cuâl, om che tu judichis e tu condanis, tu sês cence scusis; parcè che biel che tu judichis e tu condanis chei altris, tu ti condanis te. Di fat tu che tu judichis e tu condanis, tu fasis propit lis stessis robis. 2Ma o savìn che il judizi di Diu al è seont veretât cuintri di chei ch’a fasin robis di chê fate. 3Pensistu forsit, om che tu judichis chei ch’a fasin robis di chê fate e intant tu lis fasis ancje tu, di sfuî la sentence di condane di Diu? 4O spreseistu il tesaur dal so boncûr, de sô sapience, de sô pazience, no tignint cont che ogni at de bontât di Diu ti sburte a la conversion? 5Ma cul to cjâf dûr e cu la tô cussience che no vûl savênt di pintiment, tu ingrumis sore di te la rabie pe zornade dal svindic e de rivelazion dal judizi just di Diu, 6che al paiarà ognun seont lis sôs oparis: 7la vite eterne par chei che, tignint dûr intune condote oneste, a cirin glorie, onôr e inmortalitât; 8chei invezit che a son te categorie dai ribei, ch’a disubidissin a la regule de veretât e a ubidissin a la tristerie, a varan rabie e svindic. 9Tribulazion e passion a plombaran sun ogni om ch’al fâs il mâl, sul gjudeu par prin e po sul grêc; 10glorie, onôr e pâs a ducj chei che a fasin il ben, al gjudeu par prin e po al grêc.

Il fâ lis oparis de Leç al segne in maniere esclusive il vêr gjudeu

11Parcè che Diu nol fâs preferencis par nissun. 12Di fat chei che a àn pecjât cence leç, a laran a finîle malamentri cence leç; compagn chei che a àn pecjât cu la leç, a saran judicâts e condanâts midiant de leç. 13Di fat no son juscj denant di Diu chei che a scoltin la leç, ma a saran diclarâts juscj chei che le metin in pratiche. 14Cuant che i paians, che no àn leç, si compuartin tal lôr jessi seont la leç, a son leç par se stes, cun dut che no àn la leç. 15Di fat a palesin che ce che la leç e pratint al è scrit tai lôr cûrs, stant che la lôr cussience e fâs di testemoni par lôr e i lôr resonaments mo ju incolpin mo ju parin. 16Cussì al capitarà te dì che Diu al judicarà i segrets dai oms midiant di Gjesù Crist, seont il gno vanzeli.

17Sicheduncje, tu che tu ti tegnis in bon di clamâti gjudeu e tu ti pois di un continui su la leç e tu ti vantis in Diu; 18tu che tu cognossis ce che Diu al vûl e, istruît de leç, tu rivis a capî ce ch’al è miei, 19e tu ti sês metût tal cjâf di jessi guide dai vuarps e lûs di chei ch’a son tal scûr, 20dotôr dai ignorants, mestri dai fruts, e di vê inte leç la misure dal savê e de veretât…, 21poben, cemût mai che tu ur insegnis a chei altris e no tu ti insegnis a ti? Tu, che tu predicjis di no robâ, tu robis? 22Tu, che tu disis di no fâ adulteri, tu lu fasis? Tu, che no tu puedis nancje viodi i idui, tu vâs a robâ tai templis? 23Tu, che tu ti tegnis in bon cu la leç, tu disonoris Diu propit lant cuintri de leç. 24Di fat par colpe vuestre il non di Diu al ven blestemât framieç dai paians, come ch’al è stât scrit.

25Di fat la circuncision e zove dome se tu metis in pratiche la leç; ma se tu sês un ch’al va cuintri de leç, la tô circuncision e je come che no fos. 26Se alore un incircuncidût al met in pratiche lis voris comandadis de leç, il so jessi incircuncidût no i valarajal forsit come la circuncision? 27E chel ch’al è cence circuncision ma al met in pratiche la leç, seont ce che i dîs la nature, ti condanarà te che tu âs la letare de leç e la circuncision ma tu vâs cuintri de leç. 28Di fat nol è vêr gjudeu chel che al semee par difûr e nancje la vere circuncision no je chê che si le viôt inte cjar, 29ma il vêr gjudeu al è chel ch’al è gjudeu dentri vie, e la vere circuncision e je chê dal cûr, seont il spirt e no seont la letare; chel li al è laudât no dai oms ma di Diu.