Vieri Testament

GJUDITE (Gdt)


Jentrade

Il libri di Gjudite

Se la suage dal libri di Tubie e je la vite familiâr, i fats di Gjudite e ancjemò plui di Ester a àn une rissonance te storie gjenerâl dal popul ebraic. Dit chest, e je une fadie grivie chê di lâ a cirî il contest e il moment storic là che lis dôs feminis a àn operât. E il test nol jude par nuie.
Il libri si vierç fevelant di “Nabucodonosor, ch’al regnà sui assirians a Ninive” (1,1), cu la cuâl che Nabucodonosor al jere re di Babilonie e Ninive e jere za stade fiscade di so pari Nabopolassar. E vie indenant.
Come division, o cjatìn une introduzion storiche, trê parts e une conclusion.
La introduzion e trate di une campagne di Nabucodonosor cuintri dai medians. La vitorie e sburte il gjenerâl Oloferne a une spedizion punitive fint ai confins de Gjudee (1,1-3,10).
I) Il sidiament di Betulie de part di Oloferne. In pôc timp la citât e je ridusude a la streme (4,1-7,32).
II) Gjudite e Oloferne. Cheste vedue, de tribù di Simeon, biele e virtuose, si proferìs di lâ tal campament nemì. Cul jutori di Diu, e rive a cjonçâi il cjâf a Oloferne e a puartâlu a Betulie (8,1-13,20).
III) I assirians a scjampin e i israelits ur corin daûr. Grandis fiestonis in citât e cjante di agrât di Gjudite (14,1-16,17).
La conclusion e conte di Gjudite che, dopo di vê stât a Gjerusalem a puartâ regâi di avôt, e torne te pâs de sô cjase fin a la fin de sô vite (16,18-25).
Di Gjudite e de sô grande imprese no si fevele di nissune altre bande. Nol è il câs di pensâ, par chest, a une conte inventade de fantasie popolâr o a une riedizion de storie di Debore e di Sisare (Jdz 5). Pò stâi che une femine biele e fuarte, cu la sô gracie, e vedi rivât a vinci la prepotence di un caporion militâr. Il fat al è stât slargjât fintremai a fânt un moment esaltant de storie dal popul ebraic. Cussì Gjudite e je deventade in cualchi maniere la personificazion de nazion gjudaiche che si bat par difindi la sô libertât civîl e la sô religjon. In chest al sta il valôr e la atualitât de lezion di Gjudite.