Vieri Testament

ESDRE (Esd)


Jentrade

I libris di Esdre e Neemie

O vin za dit che chescj doi libris a van metûts dongje des Cronachis come une vore unitarie; no tal sens di un lavôr unic ma di un alc che ju svicine. No par nuie i prins trê versets dal libri di Esdre a son dibot edentics ai ultins dal secont libri des Cronachis.
Ce ch’al unìs chescj libris a son la ete ch’a son stâts scrits e l’intent, ch’al è chel di fâur lûs ai fedêi sui fats lontans (Cronachis) e sun chei vicins (Esdre e Neemie).
La storie di chescj timps plui vicins e je in pratiche la storie dai gjudeus ch’a tornin dongje dal esili e a tornin a fâ sù Gjerusalem e il templi.
Si podarès dividi il dut in trê parts:
I) La epopee dai gjudeus ch’a tornin dongje (Esd 1-6);
II) Lis riformis di Esdre a Gjerusalem (Esd 7-10);
III) L’organizazion inmaneade di Neemie (Ne 1-13).
No si pò lei ni capî chescj libris cence partî di chê tragjiche premesse che si clame esili. La dispersion sfuarçade dai ebreus de lôr patrie e à scomençât dal 722 p.d.C., cuant che i assirians a àn svinidrît il Ream dal nord o di Israel, menant daûrsi dute la int plui impuartante di Samarie e riplantant gjernaziis forestis.
Dopo passe un secul di vitis cun cualchi salustri (riforme di Gjosie), ancje il Ream dal sud o di Gjude al ven splantât. O sin dal 587. Gjerusalem e reste cence sacerdozi e cence liturgjie.
I depuartâts a vegnin menâts tai cjamps di concentrament di Babilonie, là ch’a fasin i contadins, a proviodin a la manutenzion dai canâi, a metin sù cualchi piçul trafic. I unics a tignî impiade la lum dal spirt religjôs e nazionalistic a son i predis, ch’a scuegnin contentâsi di fâ cognossi la leç, e i profetis, soredut Ezechiel e l’autôr de seconde part dal libri di Isaie.
Dut chest lavôr spirtuâl al ten vîf tal popul la sperance e lu prepare al moment suspirât che si podarà tornâ in patrie. E Diu si servìs di Ciro, re de Persie, par operâ il grant meracul. Cul so edit dal 538 si vierç il libri di Esdre.
Il valôr storic di chescj doi libris al è garantît dai documents ch’a ripuartin (“Memoriis” di Esdre e di Neemie, edits dai rês, letaris, rapuarts, listis anagrafichis) e dal fat che ce che si dîs culì al cjate une buine conferme te storie dai popui confinants. In plui o cjatìn ancje une consonance cu lis profeziis di Agjeo, di Zacarie e di Malachie.
Come timp di composizion, seont lis tradizions e i documents ripuartâts, si pò rivâ al III sec. p.d.C.
Il valôr religjôs al sta intun leam armonic fra storie sacre e storie profane, fra ricostruzion matereâl e ricostruzion spirtuâl. La ricostruzion no je dome un fat matereâl ch’al rivuarde templi, muris, cult, leç, ma une incressite spirtuâl di chel popul che, tornant a meti in pîts lis sôs struturis, al sint a riflorî in cualchi maniere la sô vocazion uniche di “popul sant”. E in chest, ancje il popul furlan al pò cjapâ zovament pe sô ricostruzion spirtuâl a culturâl, che no sarà facile ni curte ni scontade.