Vieri Testament

SAPIENCE (Sap)


Jentrade

Il libri de Sapience

Chest libri ch’al rissint de dominazion greche, dopo di Alessandri il Grant (+ 323 p.d.C.) come il Fi di Sirac, al trate de vere sapience ch’e je daprûf di Diu e ch’e ven comunicade ai oms. Al è l’ultin, in ordin di timp, componût in lenghe greche e nol risulte tal cjanul ebraic, ancje se l’autôr de letare ai Ebreus lu dopre come test ispirât.
Si presente come opare dal re Salomon (intai manuscrits de Bibie greche il titul al è Sapience di Salomon), ma al è claramentri un truc par dâi plui impuartance. Lu à componût invezit un gjudeu, espert dal mont elenistic, ch’al viveve in Alessandrie d’Egjit jenfri il 120 e l’80 p.d.C. Di fat si presupon la concuiste di Alessandri il Grant, fondatôr dal elenisim e de citât di Alessandrie; si presupon la traduzion de Bibie in grêc, chê dai Setante, ch’e je cognossude e doprade. O sin però prime di Filon e de concuiste romane.
In Alessandrie, tal I sec. p.d.C., e viveve une grande comunitât ebraiche, ch’e veve cjapât pît par vie dai contats seguitîfs fra Israel e l’Egjit inviâts za dai timps de monarchie. Ancje Gjeremie al fevele dai ebreus scjampâts ventijù dopo dal fruç di Gjerusalem (cc. 41-44). Se la comunitât e veve podût slargjâ il so orizont a contat cuntune culture cussì siore e petenade come chê elenistiche, al jere ancje il pericul ch’e les smamintsi la fedeltât e l’afiet pe religjon dai paris, come ch’al sucêt in ogni diaspore.
Al è a cheste int e in chest contest che l’autôr, insedât te plui pure tradizion bibliche, al cîr di convinci i siei coreligjonaris de superioritât de sapience ebraiche, ispirade di Diu e palesade in maniere concrete inte leç ch’e rêç il popul ebraic, rispiet a la filosofie e a la vite paiane, ancje se plui sflandorose e lustre.
Il libri si pò dividilu in dôs parts: - I (teoretiche): il probleme dal nestri distin al è sorenaturâl e si pò disberdeâlu dome partecipant a la sapience (cc. 1-5: inmortalitât de justizie come premi pai juscj e come cjastic pai triscj; cc. 6-9: i vantaçs de sapience tal cûr e tal operâ dal om); - II (storiche): la sapience di Diu e interven tal distin dal mont e in particolâr te storie di Israel (cc. 10-19). Di cheste storie si met in lûs la ete dai patriarcjis (cc. 10-12), la cundizion umiliant de idolatrie (cc. 13-15) e il confront fra il popul di Diu e i egjizians (cc. 16-19).
In chestis pagjinis di alte filosofie e di profonde religjon, o vin come une preparazion prossime, no dome in sens cronologjic, al insegnament dal GT su la gracie. Il distin dai oms, cussì crût in altris libris sapienziâi, culì al è inluminât de sperance che i juscj a vivaran cun Diu di là dal timp. Al è propit l’ultin pas viers la plenece de rivelazion cristiane: Crist, Sapience di Diu incjarnade framieç dai oms, al è la risultive de vite e de felicitât eterne. Chest al spieghe la grande influence che l’autôr alessandrin al à vût su la cristologjie di Zuan e di Pauli.