Vieri Testament

SALMS (Sal)


Jentrade

I Salms

Il “salteri” al è il libri ch’al ripuarte une antologjie di salms, intindint cun cheste peraule greche un cjant di laude o di preiere compagnât cun struments a cuarde. Al è il libri da l’anime, là che si cjante la vite, il dolôr, la muart, la nature, la cognossince e l’amôr di Diu, la vite individuâl e sociâl.
Inte Bibie ebraiche e latine i salms a son numerâts dal 1 al 150; tal test ebraic e tes versions fatis li sore, la numerazion dal 10 al 146 e cres di numar rispiet a la Bibie latine, parcè che l’ebraic al doplee il Sal 9 in 9 e 10 e al met adun intun salm sôl il 146 e il 147 latin.
Il nestri salteri al è spartît in cinc libris, dividûts fra di lôr cuntune laut a Diu o dossologjie che si cjate dopo i Sal 41, 72, 89, 106.
Une vore di salms a ripuartin, dacjâf, une indicazion cul non dal autôr o cuntune didascalie musicâl, come la melodie, o cu la incuadrature storiche dal componiment.
L’autôr ch’al ven fûr plui dispès te indicazion al è il re David, su la fonde di une tradizion vielonone che lu viôt “inventôr” dal salm e il plui grant poete religjôs di Israel.
I salms a son svareâts come i moments e i câs de vite. O varìn partant plui gjenars. I plui consuets a son: lamentazions individuâls, là che il malât o il perseguitât al domande il jutori di Diu (a son 38); salms di fiducie (une desene); lamentazions publichis tun moment di grant pericul (une desene); ringraciaments, tant individuâi che comunitaris (une desene); cjantis, ch’a celebrin Diu creadôr dal mont e salvadôr di Israel (une vincjine); salms pal re (une vincjine); salms pal Signôr re di Israel; salms sapienziâi ch’a tratin dal probleme dal mâl, dai patiments dai juscj, de furtune dai triscj (une vincjine).
I salms a son il spieli di un rapuart durât mil agns fra il Signôr e il so popul; a son il cjant di ducj i moments de storie dal popul ebraic, biei e bruts. A son un libri di poesie, ma a son soredut un libri religjôs. E la religjositât ur dà chê serietât e chê essenzialitât che no si cjatile in nissun componiment classic, tant mancul tai componiments mitologjics o epics.
La glesie ju à cjapâts dal mont ebraic come un tesaur e ju à fats cjantâ tal moment plui alt de sô espression, la liturgjie, coronantju cuntune laut a la Trinitât (Glorie al Pari e al Fi e al Spirtu Sant). Ju à metûts tes mans dai siei munics e des animis consacradis par ch’a celebrassin la glorie di Diu in dutis lis oris dal dì e de gnot e in dute la scansion dal an. Di fat, cul Vanzeli, il salteri al è il libri plui cognossût e doprât. Lu à doprât ancje la nestre int soredut tai gjespui e lu àn cjantât i musiciscj tes lôr plui bielis composizions.
Si pò dî che il salteri al è il cjant de umanitât e da l’anime tal so cjaminâ viers de eternitât.
Come timp di composizion, i 150 salms si spartissin suntun troi durât secui, de ete di David (sec. XI p.d.C.) al II sec. p.d.C.