Vieri Testament

CJANTE DES CJANTIS (Ct)


Jentrade

Il libri de Cjante des Cjantis

Un titul tipicamentri orientâl, un superlatîf, par dî che si trate de plui biele cjante mai sintude: la cjante al (e dal) amôr, viodût e celebrât in dute la sensibilitât di chei popui misteriôs.
Par vie dal titul, ch’al nomene Salomon, la Cjante e je stade metude tal mac dai libris sapienziâi, in jenfri di chei altris libris “salomonics”.
Al è un test siguramentri singolâr tal mont biblic. La forme dialogade e à fat scrupulâ plui soluzions: un drame pastorâl, une elegjie, un poeme liric, une racolte di cjantis d’amôr. Si è ancje domandât se si tratave di amôr sacri o profan, di une metafore dal amôr di Diu o dal amôr ch’al ten dongje un zovin e la sô fantate.
A tantis domandis e cussì svareadis, a son stadis dadis rispuestis e soluzions diferentis.
Il libri nol fevele di Diu e al dopre un lengaç cussì passionât e passionâl tal cjantâ l’amôr fra doi morôs o spôs che i critics, salacor bandonant la strade plui naturâl di une celebrazion de sacralitât dal amôr uman, a àn spesseât a fevelâ di alegorie.
Dongje de interpretazion leterâl presentade tal test, tignint ancje presint che tantis voltis intai profetis si fevele dal rapuart di Diu cul so popul in tiermins sponsâi (in Os 2; Gjer 3,1-3; Ez 23 e vie), la tradizion ebraiche e cristiane si son batudis pe interpretazion alegoriche: la Cjante e trate, in forme translade, il rapuart sponsâl fra Diu e il so popul, fonde di dute la storie ebraiche. Il nuviç de Cjante al è duncje Diu e la nuvice Israel; e stant che l’amôr di Diu pal so popul si sprolungje tal amôr di Crist pe sô glesie, il nuviç al è Crist e la nuvice e je la glesie. Altris a viodin te nuvice la Madone o ancje l’anime cristiane.
Denant di tantis teoriis e soluzions, salacor si fasarà ben a no fermâsi a une sole: ni a chê dal rût sens leterâl dal amôr uman ni a chê de rude alegorie o parabule dal amôr di Diu.
Scartant la paternitât di Salomon, se si acete la teorie dal amôr alegoric, si varà di ambientâ la Cjante tal contest e tal timp de predicazion profetiche o ancje plui in ca, jenfri il VI e il IV sec. p.d.C. No si pò escludi che l’autôr al vedi podût doprâ ancje cjantis plui antighis de tradizion popolâr.