Vieri Testament

TITO (Tt)


Jentrade

La letare a Tito

Il rimpin par mandâi a Tito la tierce letare pastorâl, plui curte di chês altris, a son lis istruzions e lis regulis in merit a la dutrine sul batisim (2,2-11, 3,3-7). Ancje in cheste vore, te suage leterarie di simpri (direzion e salût di jentrade, 1,1-4; istruzion e salûts prin di lassâsi, 3,12-15), si sclarissin lis regulis e i criteris par inmaneâ une comunitât cristiane: la liste des cualitâts ch’al à di vê un ch’al à di regi, sicu vescul, la glesie (1,5-9); istruzions sul mût che un pastôr al à di tratâ lis svareadis categoriis di personis (1,10; 3,1-2).
Par sierâ, si presente ancje il litrat dal pastôr (3,8-11). Nancje in cheste letare, cun dut ch’e je curte, no mancje la cavilade e la denuncie rissolude dai mestris bausârs, che a metin in forsit la vite de comunitât e la sô testemoneance tal ambient (1,10-16).
La letarute a Tito i dà la colme a la dutrine des primis dôs sul implant de glesie, inlidrisade cun fuarce te tradizion ma ancje spalancade cun impit missionari al mont dulintor.