Vieri Testament

LUCHE (Lc)


Jentrade

Il Vanzeli seont Luche

Il tierç vanzeli, stant al ordin dal cjanul cristian, si vierç cuntun preambul che l’autôr i fâs a dute la sô vore. Cheste vore e je spartide in doi volums: un ch’al trate de storie di Gjesù, Vanzeli, e chel altri de storie des primis Glesiis, Ats dai Apuestui.
In chest preambul, il vanzelist al sclarìs dontri ch’al à rigjavât lis notiziis, cemût che lis à inmaneadis e ce ch’al smicje cu la sô fadie. Al à podût lavorâ sui tentatîfs ch’a vevin fat altris di lôr, partint dai testemonis ch’a vevin viodût cui lôr vôi e po a vevin scomençât par prins a contâ la buine gnove. Il nestri vanzelist al à comedât e reonzût dut chest matereâl cun ricercjis fatis di persone, par podê presentâ, ordenât e complet, il discors su Gjesù e su la prime Glesie (1,1-4).
Il telâr al è sù par jù chel di Marc. Lui però al partìs de riunde di Gjesù e prin dal vanzeli public al conte di cemût ch’al è nassût e ce ch’al è sucedût in chê volte (1-2). La prime part dal vanzeli nus conte cun precision ce ch’al à fat Gjesù in Galilee (3,1-9,50). La seconde e tache cul viaç di Gjesù de Galilee a Gjerusalem, là che la sô vore e rive al colm midiant de muart e de resurezion (9,51-24,53). In cheste part il vanzelist al dispon dal matereâl cjapât sù de tradizion e ce ch’al à podût rigjavâ di persone.
Il tierç vanzeli nus presente Gjesù come “un profete potent in oparis e in peraulis”, che ur puarte “la buine gnove ai puars”. I gjescj di vuarî i malâts, il perdon ai pecjadôrs, l’acet che ur fâs ai escludûts a son un spieli de misericordie e dal boncûr di Diu. Chei ch’a acetin il vanzeli tant che buine gnove ch’e salve a puartaran ancje inte lôr vite il stîl di Diu: a metaran a disposizion dai puars dute la lôr robe e si metaran tes mans dal Diu ch’al perdone.
Chest libri al è distinât ai cristians ch’a vivin fûr de Tiere sante e ch’a vegnin, la pluritât, dal paianesim. La tradizion antighe e à simpri dit che il Vanzeli e i Ats dai Apuestui a jerin di Luche, un cristian de seconde o de tierce gjenerazion, ch’al cognòs benon il grêc e al à a man la Bibie te version liturgjiche ch’a dopravin i cristians. La stesse tradizion lu presente come dissepul di Pauli e miedi. Leint il vanzeli, si à la conferme di ce ch’e dîs la tradizion.
Luche al podarès vê componût il so vanzeli in dipendence di chel di Marc tor i agns 80, pai cristians des comunitâts che si ricognossin daprûf de tradizion di Pauli.