Vieri Testament

FILIPÊS (Fil)


Jentrade

La letare ai Filipês

La comunitât di Filips e je la prime nassude in Europe, intant dal secont viaç missionari di Pauli, sul scomençâ dai agns cincuante. Cuant ch’al jere a Filips, Pauli lu àn bastonât in place presince di ducj, ma al à rivât distès a inviâ une comunitât vivarose e impegnade. Pauli al ricuarde cheste passion e chest impegn te preiere ch’e vierç la letare (1,3-11) e ur à a grât di vêi dade une man ancje materialmentri te sô vore di vanzelisazion. Nol è trop che i àn mandât ufiertis e un jutori te persone di Epafrodit (4,10-20).
Cumò Pauli al è in preson e nol sa cemût ch’al larà a rive il procès. Al spere, anzit al è sigûr tal Signôr che lu molaran e ch’al podarà tornâ a viodi i siei cristians di Filips. La letare le à detade stant in preson par fâur savê di sè, par fâur cjapâ part a lis sôs sperancis e ai siei progjets (1,12-26; 2,19-30). Al sa che i cristians di Filips le àn intrigade par vie dal ambient paian contrari e ancje par colpe di divisions e di contrascj dentri de comunitât stesse. Par chel ur racomande di stâ salts e di no pierdisi di spirt tai confronts di chei di fûr, biel che te comunitât a àn di vê une profonde comunion di cûr e di volontât. A cjataran une risultive e un spieli di chest stamp di vite te storie di Gjesù, il Fi di Diu, fedêl fint a la muart e metût partant Signôr di ducj (1,27-30; 2,1-11).
And è però un altri câs che i sta a cûr a Pauli. Al sa ch’a son rivâts ancje a Filips missionaris ch’a contin un vanzeli che nol è vêr, ch’a dinein la crôs di Crist e che si tegnin in bon des lôr lidrîs e des lôr tradizions gjudaichis. Alore Pauli, tal toc centrâl de letare, al vise i cristians di Filips di stâ vuardâts di chescj “fals lavorents”. Al finìs cul racomandâur di stâ in pâs e fedêi in dut (4,3-9).
La letare ai Filipês le à mandade di un puest pôc lontan di Filips, parcè che si rigjave che lôr e Pauli a àn tante pussibilitât di tignîsi informâts. Cjalant ancje altris letaris autentichis, si pò pensâ che cheste citât, là che Pauli al è in preson, e sedi Efeso, là ch’a vevin un “pretori”, palaç dal governadôr, e là ch’a jerin chei ch’a ministravin i bens dal imperadôr, “chei de cjase di Cesar” (1,13; 4,22). La letare le varès scrite tor la metât dai agns cincuante, cuant che Pauli si fermà te citât di Efeso.
Ducj i cristians di dutis lis etis a àn ce imparâ di cheste letare scrite a la comunitât di Filips, pe ricjece teologjiche di ce ch’e dîs – la bielissime laut a Crist Gjesù (2, 6-11) – e pal grant afiet ch’e je imbombade. “Par me il gno vivi al è Crist”: e je cheste la reson e la lidrîs de sperance e de gjonde che Pauli al vûl spartî cui cristians.