Vieri Testament

EFESINS (Ef)


Jentrade

La letare ai Efesins

Cheste vore, che le àn simpri dite di Pauli, e je tal mac des letaris “de presonie” par vie che Pauli al è presentât tant che il “presonîr dal Signôr”, incjadenât pal vanzeli (3,1; 4,1; 6,20). I scrupui su l’autenticitât di cheste letare, ch’e à colegance cun chê mandade ai cristians di Colossis, a saltin fûr pal fat ch’al semee che nol vedi mai cognossût ni visitât i cristians di Efeso, cu la cuâl che in altris letaris si lei ch’al à sostât un pieç in chê citât. E ancje la lenghe, il stîl e il contignût no son propit chei che si cjatiju tes letaris ch’a passin par autentichis. Nancje la direzion no je sigure, che di fat cualchi manoscrit antîc e impuartant al salte “ai cristians ch’a son in Efeso”. Pa la cuâl si pò scrupulâ che cheste letare le vedi mandade un dissepul di Pauli a lis Glesiis de Asie che si ricognossin tal çoc di Efeso, par memoreâur l’insegnament tradizionâl dal apuestul.
La letare si vierç, dopo dal salût, cuntune cjante di benedizion là che si presente il plan de salvece di Diu, pandût e puartât al colm in Crist Gjesù (1,3-14). Si insede culì la preiere ch’e vierç la prime part, dutrinâl. I cristians, in fuarce de fede e dal batisim, a componin il cuarp di Crist, la Glesie, là che si son dâts dongje doi grops: ebreus e paians. Chest disen di Diu, o misteri, al è palesât adimplen tal vanzeli e si fâs dì par dì te Glesie (1,15-3,21). La seconde part de letare, pratiche, e tire lis conseguencis di ce ch’al vûl dî lâ daûr di Crist. I cristians a àn di vivi te unitât de stesse fede e dal unic batisim; a fasin chel cuarp che Crist al è il so cjâf, risultive de vite e di unitât. Il progjet di vite cristiane, ch’al diven dal impegn dal batisim, al è splanât tune schirie di dovês di metiju in pratiche in dutis lis condizions tant di famee che di societât (4,1-6,20). La letare si siere cuntun piç di racomandazions e cul salût (6,21-24).
La letare ai Efesins e va une vore ben par capî cemût che Pauli al à disvuluçade la sô dutrine su la Glesie, cuarp di Crist, là che si palese e che si met in vore il disen o misteri de salvece a pro di ducj i oms.