Vieri Testament

COLOSSÊS (Col)


Jentrade

La letare ai Colossês

Ancje cheste letare e je tal mac des letaris de presonie, cul stamp ideâl di Pauli presonîr ch’al patìs pal vanzeli (1,23-24; 4,3). E je mandade ai cristians di Colossis, une citât de Asie minôr, pôc lontan di Efeso, ma si racomande di fâure lei ancje ai cristians de citât di Laodicee (4,15-16). In chescj lûcs la buine gnove le à puartade Epafre, un dissepul di Pauli (1,7; 4,12). Pes resons edentichis de letare ai cristians di Efeso, ch’a àn colegance in tancj ponts, ancje la letare ai Colossês e varès di jessi di un dissepul ch’al scrîf cul non e cu l’autoritât di Pauli pai cristians di chê glesie, cul fin di visâju des gnovis dutrinis che i puartin prejudizi a la integritât de fede cristiane. Si trate di un miscliç di cantins sui agnui e su lis potencis dal cîl di une bande e di tradizions e di usancis gjudaichis di chê altre (2,6-23). Il cuintrivelen plui induvinât par salvâsi di chest imbastardiment dal vanzeli al è chel di tignîsi strents daprûf di Gjesù Crist, ch’al à il prin puest te creazion e te redenzie (1,15-20). I cristians ch’a àn vût il vanzeli, la gnove che Pauli al è servidôr e cursôr, a son il cuarp di Crist, là ch’al va splanantsi il disen di salvece di Diu in pro di ducj i oms (1,21-2,5).
La seconde part di cheste letarute e tire lis conseguencis pratichis: si à di dâ une coerence di vite al impegn dal batisim. Par mostrâ in concret il progjet di vite cristiane, l’autôr al fâs une tabele dai vizis che si à di scjuvâju e des buinis cualitâts che si à di metilis in vore e ancje dai dovês che i cristians a àn di stâ sotoponûts cence cjalâ ni il nivel sociâl ni il puest (3,1-4,1).
La letare si siere cul implant tradizionâl, dant cualchi informazion e sgambiantsi i salûts fra i cristians (4,2-18).
Cheste piçule letare mandade ai cristians di Colossis e jude i cristians di ogni ete a scuviergi la sostance de fede.
Gjesù Crist al è il cûr di dute la rivelazion e la salvece di Diu, cence scugnî lâ a pitocâ riontis e suplements umans.