Vieri Testament

APOCALìS (Ap)


Jentrade

L’Apocalìs di Zuan

La ultime vore dal cjanul cristian e je un test profetic, imparintât cun chel particolâr gjenar leterari cognossût come apocalitic. No je lafè une novitât cheste in chê biblioteche ch’e je la Bibie, là che ancje tai profetis classics si cjate tocs apocalitics. Ma chest gjenar leterari al cjape pît soredut dopo de crisi dal esili, VI-V secul p.d.C., e al à il so plui grant spieli tal libri di Denêl. Ancje tai vanzei sinotics a son metudis dentri tradizions apocalitichis. A componin il “discors” di Gjesù su la fin di Gjerusalem e dal mont. Il cuart vanzeli nol à un vêr e propi discors in merit de fin. Invezit, te scuele di Zuan, la tradizion apocalitiche cristiane e je ingrumade intun libri ch’al à juste il titul di “Apocalìs di Zuan”.
L’autôr si presente sicu “Zuan”, servidôr di Crist, fradi e compagn te tribulazion, tal ream e te fermece in Gjesù. Al è confinât te isule di Patmos “par colpe de peraule e de testemoneance fate a Gjesù”, Ap 1,1.9. Partint di cheste presentazion che l’autôr stes al fâs di sè, si è lâts a cirî cui ch’al podeve jessi, simpri tal agâr de tradizion di Zuan. Di fat e je une vore di colegance di spirt, di lengaç e di temis cul cuart vanzeli e cu lis letaris. Ma and è ancje tantis diferencis soredut di inmagjin e di stîl, ch’al è carateristic di chest test apocalitic. Chest al à puartât a diferenziâ l’autôr de Apocalìs di chel dal cuart vanzeli e des trê letaris. Cheste diviersitât le cognossin za tai prins secui cristians, stant al storic Eusebi di Cesaree. Il scrit, distinât a lis glesiis de Asie, si pò plaçâlu tal ambient di Efeso sul finî dal prin secul, intant de persecuzion di Domizian, 81-96 d.d.C.
Il gjenar apocalitic si spieghilu cun cheste situazion intrigade. Si jere tal burlaç de prime persecuzion che l’autoritât statâl e faseve tes glesiis de Asie minôr. Il cantin di fonde al è chel de religjon dal imperadôr. Dentri des glesiis a nassin dôs tendencis. Cualchidun al propon un compromès cu l’istituzion imperiâl cence rivâ a la vuere e al martueri. Altris invezit a disin che si à di vê plui fermece e fedeltât cu la tradizion dai profetis e dal vanzeli. L’autôr al è il rapresentant di chest secont grop e al trate i prins di fals apuestui e di fals profetis. Al propon une fedeltât e une fermece sul stamp di Gjesù Crist, il martar dai martars, l’Agnel sacrificât.
Tignint denant dai vôi chest intent e il gjenar leterari apocalitic, si pò cjatâ fûr ancje une glagn in chest libri che di une bande ti incjante pe ricjece di paragons e di inmagjinis e di chê altre al reste sigjilât e invuluçât tal misteri. Dut l’implant al è inmaneât in doi tocs: Apocalìs 1-3 (prin toc) e 4-22 (secont toc). Il prin si vierç cuntun sprolic, sul stamp dai profetis dal VT, 1,1-3. Subit dopo e ven une sorte di direzion e di salût, come tes letaris, 1,4-8. In realtât si inmagjine che il libri al vegni let intant di une semblee liturgjiche. Di fat si siere in chest contest, 22,16-20.
Il prin toc, daspò dal sprolic e dal salût di jentrade, si vierç cu la vision di Crist che i dà l’incariche al profete di scriviur a lis siet glesiis ch’a rapresentin la glesie universâl, 1,9-20. Po a son lis siet letaris che il profete, a non di Crist resurît, ur mande a lis glesiis, 2,1-3,22. Finidis lis letaris, al tache il secont toc, che si vierç cuntune grande vision profetiche e al è spartît in cinc sezions:
1. Vision de sente di Diu, dal libri e dal Agnel, 4,1-5,14;
2. Si rompin i siet sigjîi, 6,1-7,17;
3. Lis siet trombis, 8,1-11,14;
4. I trê spiei e lis siet copis, 11,15-16,16;
5. La lote finâl, il judizi e la Gjerusalem dal cîl, 16,17-22,5.
L’Apocalìs e à une straordenarie atualitât parcè che, midiant di un lengaç simbolic tiessût di numars, di colôrs e di figuris, e vûl insegnânus alc di impuartant. L’intent al è chel di judâ i cristians a fâi front a la idolatrie statâl, che mo ti lenç e mo ti menace. Chest pericul al è dome un moment de grande lote jenfri il ben e il mâl, ch’e durarà fintremai ch’e durarà la storie dai oms. Di une bande al è Diu cu lis sôs schiriis e di chê altre i rapresentants dal mâl. Ma la storie di Gjesù, il martar copât dai oms e resussitât di Diu, e je pai cristians une garanzie che, a la fin, a vinçaran lôr.
A àn di lâi daûrji cun fede e cun fermece, savint che lui al à biel screade la gnove creazion, là ch’e je plaçade la gnove Gjerusalem. A la fin, lis fuarcis dal mâl a saran vinçudis e fiscadis, a la cuâl che chei ch’a saran restâts fedêi te tribulazion a varan part a la vitorie e al ream di Gjesù Crist.