Vieri Testament

2 ZUAN (2 Zn)


Jentrade

La seconde e tierce letare di Zuan

Chestis dôs voris, che il cjanul cristian lis à simpri metudis sot il non di Zuan, a son doi sfueuts ch’a àn dut l’implant di une letare. Di fat si viergin cu la direzion e cul salût di jentrade e si sierin cuntun salût di cumiât. La seconde letare e je mandade a di une comunitât clamade “la Siore preferide”; la tierce invezit e je mandade a di un cristian, Gaio, amì di cûr dal predi. Il stîl e lis cuistions a son sul stamp de prime letare di Zuan. Par chel si pò scrupulâ che l’erêt spirituâl di Zuan al vedi scrit dutis chestis trê letaris. L’ambient al è chel de glesie di Efeso; pal timp no si è lontans de fin dal prin secul.
La seconde letare di Zuan e vise ducj chei che le learan di stâ vuardâts dai dissidents, clamâts “anticriscj”, e ju invide a vivi la veretât midiant dal amôr fra fradis.
La tierce invezit e fronte il cantin de autoritât tes glesiis. I racomande a Gaio di viergiur la puarte ai missionaris mandâts dal predi. Chestis dôs letarutis a son interessantis parcè che a fasin un fregul di lûs sul implant e sui rapuarts fra lis glesiis sul finî dal prin secul, tal spirt de tradizion di Zuan.