Vieri Testament

2 TESSALONICÊS (2 Ts)


Jentrade

La seconde letare ai Tessalonicês

La tradizion e à tignût cont une seconde letare mandade a la glesie di Tessaloniche. E trate di cualchi cuestion za frontade inte prime, a rivuart dal Signôr ch’al à di tornâ. Un trop di cristians, doprant rivelazions ch’a varessin vût e ancje letaris che ur es varès mandadis Pauli, a disevin ch’al stave tornant. La robe e veve fat sunsûr e confusion te comunitât e plui di un, che no vevin pêl di voe di fâ ben, si aprofitavin par mangjâ e par bevi a puf. Il teme dal Signôr ch’al torne al è tratât in maniere diferent de prime e nancje il stîl e il vocabolari no son edentics. Sicheduncje al è vignût fûr il scrupul che la letare le vedi mandade a la comunitât di Tessaloniche un dissepul di Pauli, cetancj agns dopo de fondazion di chê glesie.
L’autôr al salude e al trate daurman dal judizi di Diu ch’al fruçarà i triscj e ch’al salvarà i bogns (1,3-12). Podopo al trate de cuistion primarole: il Signôr ch’al torne. Nol torne a bot e sclop, usance cualchidun, ma prin si varà di viodi i spiei de grande crise finâl inviade dal grant nemì, satane, e dai siei seguaçs. Chel ch’al vinçarà, però, a la fin di dut al sarà il Signôr Gjesù (2,1-12). Par chel no si à di pierdi la fede e la voe di fâ e di tignî dûr (2,13-3,5). E ancje i cristians a àn di vivi conforme tra di lôr, coregint chei fradis ch’a vivin malamentri e cence fâ un colp (3,6-15). Une preiere curte e un salût prin di lassâsi a sierin la letare (3,16-18).
La letare ai Tessalonicês, curte, e je un grum impuartante parcè che nus mostre cemût che la glesie de prime ete e à savût paronâ une crise ch’e leve a sfiliâ drete la sperance cristiane. Cuintri de tendence a fuî de realtât par lâ daprûf di çavariaments e di sflocjis apocalitichis, la letare si ripie a di chê salde tradizion che Pauli le garantìs cu la sô autoritât, par presentâ un cristianesim centrât su la fede, che i dà vigorie a la sperance e a un amôr plen di snait e di voe di ben.