Vieri Testament

2 PIERI (2 Pt)


Jentrade

La seconde letare di Pieri

O vin un’altre vore sot il non di Pieri ma, a diference de prime, la tradizion cristiane e à cuistionât un grum parsore. E je acetade tor dal IV-V secul, plui che altri par influence di Jeroni. Nol pò vêle scrite chel de prime letare e tant mancul Pieri: il stîl e lis cuistions a son masse diferents. Si trate facilmentri di un cristian de seconde gjenerazion, diferenziade di chê dai apuestui (3,1-2). Par chel ch’al rivuarde il timp, si pò scrupulâ pe fin dal prin secul o pal scomençâ dal secont. Pal lûc, no si varès di slontanâsi de Asie Minôr o ancje dal Egjit, là che cheste vore e à lis sôs primis testemoneancis tor dal III secul.
Ur scrîf ai cristians ch’a viodin a sdongjâsi il burlaç de “eresie”. Te letare si cjate chest implant polemic cuintri di chei cristians che l’autôr ju clame “fals mestris o profetis”: int ch’a àn une fuarte simpatie pes teoriis “gnostichis” ch’a volaressin ridusi la fede a rude “cognossince” o a çavariaments sul distin des animis. Te vite pratiche però si lassin lâ avonde vulintîr, butant di bande ogni regule morâl e ogni principi.
Stant ancje al test, l’intono de letare al è chel di un cumiât: Pieri, chest om ch’al à vût un puest cussì impuartant te glesie, al sint che la muart no je lafè lontane (1,14). Chest l’implant de vore. Dopo de direzion e dal salût di jentrade, o vin une sorte di statût dai cristians, ch’a àn une “cognossince” vere di Diu fondade su la fede (1,3-11). Par parâsi dal pericul dai fals mestris, l’autôr al dà ancje i criteris de veretât (1,12-21). Podopo e ven la condane cence remission di chescj fals mestris (2,1-22): rispuindint pont par pont ai lôr cantins e dant cualchi sclariment sul Signôr ch’al torne (3,1-16). Il rimpin dai nemîs de fede al è che il Signôr s’intarde a tornâ, tradint dut ce ch’al veve imprometût. L’autôr al invide a considerâ invezit la pazience di Diu tant che une ocasion di no strassâle par mendâsi prin dal judizi finâl.
Cheste vore e va ben ancje in dì di vuê pai criteris che nus dà su la veretât cristiane denant dal pericul di lâ fûr di troi: la peraule de tradizion dai apuestui e je une conferme di ce ch’a àn dit i profetis te Scriture. Dome che l’interpretazion de Scriture, inspirade di Diu, no si pò lassâje a di un o a di chel altri, a so gust e plasiment. Zontât cu la tradizion, o vin il teme de fedeltât a la fede. Une fede che no devente pratiche di vite e vâl pôc e nuie e no si à il parcè di lâi daûrji.