Vieri Testament

1 ZUAN (1 Zn)


Jentrade

La prime letare di Zuan

Tal cjanul cristian and è trê letaris cul non di Zuan. La prime ducj le tegnin par canoniche e je dan a Zuan ancjemò tal II secul. Di fat, te prime letare, si pò palpâ cheste colegance di lengaç e di temis carateristics dal cuart vanzeli. Però and è ancje cualchi diference a nivel di vocabolari e di implant teologjic. La strade plui sigure par disberdeâ chest cantin e je chê di dâi il scrit a di un cristian de scuele di Zuan, un om di une certe impuartance, che ta chês altris letaris si presente come il “predi”. Chest al cjate conferme za sul scjadê dal secont secul tal ambient efesin de Asie minôr (Papie di Gjerapoli). L’autôr al ripuarte la tradizion che si ripie al “dissepul”, la stesse dal cuart vanzeli. L’ambient ch’al è stât componût dut al pò jessi duncje la glesie di Efeso. Pal timp, si à di lâ a dopo dal vanzeli, tor la fin dal prin secul.
L’intent di cheste vore al è chel di rinfuarçâ la fede dai cristians midiant di une tradizion sigure che si riclame a Zuan. L’ocasion e je golose par meti in vuaite i cristians cuintri dai dissidents, che te letare a son clamâts i “anticriscj” (2,18). Si trate di cristians taiâts fûr de comunitât, ch’a dinein la realtât fisiche de umanitât di Gjesù, seben che lu acetin par Crist e par Fi di Diu. Cun chest implant, la sô muart in crôs pe remission dai pecjâts no vâl nuie. Come conseguence pratiche, i dissidents a tibiin il comandament di fonde dal amôr fra fradis. La letare duncje e je pluitost un test di dutrine ch’al dopre ce che si leve insegnant te tradizion cristiane.
Seont il mût di componi di Zuan, la vore si pò spartîle in trê grandis unitâts. Daspò dal sprolic, ch’al riclame chel dal cuart vanzeli, o vin chest ordin:
1. Diu al è lûs (1,5-2,28);
2. Vivi tant che fîs di Diu (2,29-4,6);
3. Diu al è amôr (4,7-5,13).
Si siere cuntune piçule racomandazion a preâ pai fradis ch’a sgarin e cuntun struc di dut ce ch’al è stât scrit (5,14-21).
La sostance de letare e je la comunion cun Diu che nus salve midiant di chê fede che nus e àn contade i testemonis storics de peraule di vite. La fede de tradizion e dîs che Gjesù al è il Crist e il Fi di Diu “vignût te cjar”, che nus salve midiant de sô muart. Chi si palese il grant amôr di Diu, che i fâs lûs a dute la vite dai oms. Diu al è lûs parcè che al è amôr. Cheste manifestazion storiche dal amôr di Diu e je la risultive e il spieli dal amôr cristian. Duncje la fede gjenuine, ch’e salve e ch’e ten adun fra di lôr e cun Diu i cristians, e je chê ch’e ricognòs Gjesù salvadôr e ch’e met in vore la buine gnove midiant di un amôr di fradis.