Vieri Testament

1 TESSALONICÊS (1 Ts)


Jentrade

La prime letare ai Tessalonicês

Cheste e je la prime letare di Pauli e ancje il document cristian plui vieri ch’o vin sot man. E di fat la glesie te citât di Tessaloniche, un grant puart sul mâr Egjeu te regjon de Macedonie, Pauli le à plantade intant dal secont viaç tai agns 50/52, insieme cun Silvan e cun Timoteu, daspò de brute aventure di Filips (2,1). Pauli al à scugnût bandonâ la comunitât cristiane a pene creade par colpe dai gjudeus, che lu vevin in asse. Rivât a Atene, al è lât indenant dibessôl fintremai a Corint e al à mandât a Tessaloniche Timoteu par dâur spirt e fuarce a di chei cristians. A pene che Timoteu al è rivât a Corint cun buinis gnovis, Pauli al scrîf cheste letare par colmâ la formazion dai cristians di Tessaloniche e par splanâ ancje cualchi berdei che i veve motivât Timoteu. La letare le à componude a Corint sul scomençâ dai agns cincuante, vadì dal 51/52 d.d.C.
Il telâr di cheste prime letare di Pauli al è chel solit. Si vierç cul salût cristian di “gracie e pâs” (1,1). Subit dopo, la preiere di ringraciament che Pauli al dopre par memoreâ dut il ben ch’al à podût fâ a Tessaloniche e ancje il spirt e la vivarositât di chei cristians. Fasint une sorte di confession publiche, ur ricuarde ce intenzions ch’al veve cul so mût di contâ la buine gnove, par sfantâ suspiets e cjacaris metudis fûr sul so cont dal ambient gjudaic contrâr.
La seconde part de letare e reonç cualchi regule di compuartament morâl (4,1-12) e e cîr di sclarî la cuistion de sperance cristiane. I cristians di Tessaloniche a jerin ancjemò sotsore par vie ch’a vevin vût cualchi muart e a scrupulavin che il lôr distin al fos stât comprometût parcè che a jerin muarts prime ch’al tornàs Gjesù. Pauli ju cidine batint sul significât de sperance ch’e à la fonde su la resurezion di Gjesù (4,13-5,11). Par ultin ur dà cualchi istruzion e cualchi racomandazion in merit de vite de comunitât. Al siere invidantju a no molâ e saludantju di cûr (5,12-28).
Cheste prime vore cristiane e documente che, a vincj agns dai fats di Gjesù di Nazaret, si jere za inmaneade une tradizion cristiane, cul so patrimoni di dutrine e di regulis morâls. E je ancje un spieli dal contat pastorâl di Pauli, plen di umanitât e inspirât a la sostance de fede cristiane, par tirâ sù une comunitât di cristians fûr di pupîl e in stât di tignî dûr.